Keyeyê Edîtora Bianetî Rûkene Tuncel 10ê tebaxe de qezaya Beylîkduzuyî ya Îstanbulî de raştê hêriş û tacîzê nîjadperestî ame. Cîrananê keyeyî waya Tuncele derb kerde, keye pê kiştişî tehdît kerd û nêngî çinayî.

Rûkene Tuncela ke gerreyê hêrişkeran kerdo, derheqê babete de ANFyî rê qisey kerd. Rûkene Tuncel pare kerd ke nika taxa înan de pêro dêrsimijî hêrişanê winayênan ra qerqilîyenê.

Rûkena ke wextê hêrişî de keye de nêbîya pare kerd ke cîrananê înan ê qatbinî cîranê înan ê qatser teşwîq kerdo. Rûkene vat: ''A roje wexto ke dadîya mi û waya mi marketî ra agêrayêne cîrananê ma yê qatserî M.Y. û A.Y. nêngî çînayê waya mi, dima nînan hêrişê waya mi û dadîya mi kerda û waya mi derb kerda. Hêrişkeran keyeyê mi rê vato 'Polîsî zî ma yê dewlete zî ma yê. Ma Trabzonî ra yê, keye de çeka mi est a. Şima elewî yê. Ez pê na çeke do şima bikişa.'

Wexto ke polîsî ameyî, keye de nêgêrayî çeke. Polîsan hêriş sey 'nîqaşê cîranan' pênase kerd. La Nê kerdişî hêrişê nefretî yê. Nika asayîşê keyeyê mi çin o. Polîsan gefê kiştişî zî peygoş kerd teyna bira tedbîre girewte. Wa çew nê serebûtî normalîze nêkero. Nika taxa ma de pêro dêrsimijî qerqilîyenê. Cîrananê hêrişkeran polîsan rê seba ma vato 'terorîst.' Sîyasetmedaranê Tirkîya nasnameyê merdiman ser o wina nefret awan kerdo. Ez edaletî wazena.''