Partîya Çep a Keske Şirnex, Êlih û Amed de buroyê xo yê weçînayîşî akerdî.

Şirnex de taxa Cumhurîyetî de buroyê weçînayîşî ame akerdene. Hemserekê KCDyî Berdan Ozturk, Hemvervatoxê Partîya Çep a Keske Îbrahîm Akin, Hemsereka DBPyî Salîha Aydenîz, Serekê EHPyî Hakan Ozturk tewrê akerdişî bîyî. Heyetî şarî reyde govende girewte. Polîsan xîret kerd ke dormeyê girseyî bigêro la girseyî bi sloganê ''Bijî Serok Apo'' cewabê polîsan da. Polîsan naye ser o gazê îsotî şuxilna. Polîsan hêrişê girseyî kerd la rixmê ney zî girseyî vera sloganan vat. Hêrişî ra dima akerdişê buroyan dewam kerd.

Aydenîze, Ozturk û Îbrahîm Akinî tîya de qisey kerd. Înan da zanayene ke îtîfaqê Cumhurî Îtîfaqê Torosê Sipî yo la Îtîfaqê Torosê Sipîyî do sindoqan de bin bikewo.

Qiseykerdişan ra dima wexto ke girse vila bîyêne polîsan bi gazê îsotî û guleyanê plastîkan hêriş kerd û 3 kesî destbend kerdî.

Amed de Partîya Çep a Keske Parka Newroze ya Rezanî de buroyê xo yo hîrêyîn akerd. Namzetê Amedî Halîde Turkoglû, Adalet Kaya, Mehmet Emîn Aktar, Azad Bariş, Ceylan Akça, Sorgul Aytek Avşar zî tede xeylêk kesî tewrê akerdişî bîyî. Qiseykerdişanê namzetan ra dima Mayanê Haştîye bi sloganê 'Jin, Jiyan, Azadî' buro akerd.

Êlih de taxa 19 Mayisî de buroyo şeşin ame akerdene. Wekîla HDPyî ya Êlihî Feleknase Uca, namzetê Êlihî Zeynepe Oduncu, Nurtene Ertugrul û Ekrem Baran tewrê akerdişî bîyî. Wextê akerdişî de sloganê sey “Bê Serok jiyan nabe”,  “Bijî Serok Apo”, “Bijî berxwedana zîndanan” û “Jin jiyan azadî” ameyî vatene. Qiseykerdişan de ame vatene ke Partîya Çep a Keske do îqtîdar bin bivisna.