Endamê Komeleya Huqûqnasanê Seba Azadîye (OHD) Avûkat Şemdîn Şahînî tecrîdê vera Rayberê Şarê Kurdî Abdullah Ocalanî ANFyî rê ercna.

Şahînî îfade kerd ke dewlete bi serran o bi hawayêkê sîstematîkî tecrîd ferz kena û vat: ''Birêz Ocalan muxatabê çareserîya meseleya kurdan o. Pê tecrîdî şexsê Abdullah Ocalanî zî kurdî yenê cezakerdene. Pê tecrîdî dewlete verê çareserîya kurdan gêna. Dewlete seba ke nêwazena meseleya kurdan pê rayîrê demokratîkî çareser bikera tecrîd giran kena.''

Şahînî bale ante pêvînayîşê bi telefonî yê Abdullah Ocalanî ser û vat: ''Pê birnayîşê telefonî dewlete vat 'ez key biwaza şima o wext eşkenê qisey bikerê.' Dewlete pê qiseykerdişê telefonî tecrîd meşrû kena. Ocalanî waşt ke avûkatanê xo bivîno û nê telefonî qebul nêkeno. Bi nê hawayî ey bale ante meşrûkerdişê tecrîdî. CPTyî zî 2019 de eşkera kerd ke Îmrali de tecrîdêko mutlaq esto. Dewlete tecrîd nêwedarit û kerd giranêr. Ganî Tirkîya goreyê peymananê mîyanneteweyîyan têbigêra û tecrîd wedarna. Birêz Ocalan Kurdîstan, Tirkîya, Ewropa û Rojhelatê Mîyanênî de kesayetêko sîyasî û komelkî yo.''

Şahînî vist vîrî ke 27ê teşrîna peyêne ra nata zîndanan de vera tecrîdî û binpaykerdişanê heqanê tepişteyan grevê vêşanîye dewam keno û vat: ''Tepişteyî seba caardişê qanûnan grev de yê. Seba ke sey grevê 2018-2019 netîceyê giranî û mergî nêqewimîyê ganî waştişê tepişteyan bêrê caardene. Waştişê înan meşrû yê. ''