Bajaranê Wan, Bedlîs û Colemêrgî de DEM Partî rê zaf muracatê vernamzedîye benê. Bajaro tewr pîl ê Serhadî Wan de semedê hemşaredarîye û endamîya meclîsî xeylêk muracatî ameyî kerdene. Reyna bajaranê muhîman ê Serhedî ra Bêdlîs û Colemêrg de zî DEM Partî rê eleqeya pîle est a.

Vervatoxê Komîsyonê Weçînitişî yê Bajarî yê Wanî yê  DEM Partî Delîl Aksoyî ard ziwan ke şarê Wanî do weçînitişê cayîyî yê 31ê adare de cewabê qeyûmanê ke îradeyê înan nasnêkenê bido. Aksoyî vat, ''Şarê Wanî nê prosesî de wayîrê partîya xo vejîya. 105 cinîyan semedê vernamzedîye muracat kerd. Hîrê cinîyan semedê Hemşaredarîya Bajarê Pîlî yê Wanî muracat kerd. Embazanê ma camêrdan ra zî 706 kesan muracat kerd. 9 embazan semedê Hemşaredarîya Bajarê Pîlî yê Wanî muracat kerd. Ma do 13ê çeleyî de sandikan verê şarê xo de ronê. Namzedî do hetê şarê ma ra bêrê weçînitene.''

Hemserekê DEM Partî yê Bedlîsî Fîkret Bîrlîkî zî ardi ziwan ke zaf muracatî est ê û  nê vatî: '2118 cinîyan muracat kerd. DEM Partî do serkewtişê xo yê weçînitişê pêroyî weçînitişanê 31ê adere de zî ramojno. Şarê Bêdlîsî zaf paştî dano. Rixmê heme kayanê îktîdarî şarê Bêdlîsî tim wayîrê îradeyê xo vejîyeno. Ma nika ra vînenê ke derheqê weçînitişê cayîyî yê 31ê adare de şar senî wayîrê DEM Partî vejîyeno. Ma do bi paştdayîşê şarê xo Bêdlîs de serkewtişê pîlî bifînê dest.''

Colemêrg de zî şar rixmê kayanê dewlete wayîrê Îradeyê xo vejîyeno .Colemêrg de 47 kesan hemşaredarîye, 80 kesan semedê endamîya meclîsê pêroyî yê bajarî û 130 kesan semedê endamîya meclîsî muracat kerd.