Wano ke 10 weçînayîşanê 21 serranê peyênan de AKP bin visnayo xo amade keno ke 14ê gulane de zî AKPyî bin bivisno.

Şarê Wanî ANFyî rê derheqê weçînayîşan de qisey kerd û pare kerd ke ê do AKPyî bin bivisnê.

Xane Akkoş ard ziwan ke bi serran o a raya xo dana HDPyî û vat: ''M do narey raya xo bidê Partîya Çep a Keske. Nê weçînayîşî do bibê weçînayîşê peyênî yê AKPyî. Şarê ma do îradeyê xo bimojno. Ma do ser bikewê. Ez pê bawer a ke Partîya Çep a Keske Wan de 8 wekîlan biveja.'' 

Atîlla Kumlîyî dîyar kerd ke ê do 14ê gulane de raya xo bidê Partîya Çep a Keske. Kumlîyî vat: ''14ê gulane de ma do faşîzmê AKP-MHPyî pêro Kurdîstanî ra pakî bikerê. Ma do Partîya Çep a Keske reyde rîpelêkê neweyî seba ameyoxê demokratîk û azadî akerê.''

Şeref Tîmurî vat: ''Ma do 8 wekîlan Partîya Çep a Keske ra vejê. Ma do AKPyî bikerê partîya tabela. Şarê ma hînî nê îqtîdarî ra aciz bîyo. Ma qerardar ê ke nê sîstemê faşîstî bin bivisnê. Pêro weçinîtoxê partîya ma sey xebatkaranê partîye xebitîyenê. Ma do 14ê gulane de netîceyanê ney bivînê.''