Meclîsê Ciwanan ê Partîya Çep a Keske Îstanbul de şayîya weçînayîşî viraşte. Ciwanan verî waşt Parka Sîbele Yalçin de şayîye virazê la qeymeqamîye şayîye qedexe kerde. Naye ser o ciwanan verê bînaya HDPyî de şayîye viraşte û bi slogananê “Bijî berxwedana ciwanan” û “Ciwan li vir in” zî qedexe protesto kerd.

Kuçe bi pankarta ''Ma bi ciwanan dest pêkerd, do bi ciwanan ser bikewê'' xemilîya. Ciwanan pîya sloganî vatî û govende girewte. Namzeta Partîya Çep a Keske Berfîne Polat şayîye de qisey kerd û vat: ''Ma bi xoverdayîş û hêrsî tîya de yê.''

Hemvervatoxê HDKyî û namzetê wekîlîye Cengîz Çîçekî zî ard ziwan ke heta ke têkoşînê ciwanan dewam bikero, faşîzm do mîyanê tersî de bibo. Çîçekî vat: ''No têkoşîn kuçeyan de bîyo pîl û do kuçeyan de ser bikewo.''

Şayîye de Koma Hevra deyîrî vatî. Ciwanan şayîye de waşt ke wa Rayberê Şarê Kurdî Abdullah Ocalan azad bibo.