Nameyê Şêx Seîdî 2011 de hetê Şaredarîya Amedî ya Partîya Demokrasî û Haştîye ra dîyabi bulwarê serê rayîrê Farqîn-Xarpêtî. Bi îdîaya ke 'Qeyûmê Amedî no name dayo bulwarî ra' Şêx Seîd amebi hedefkerdene. Partîyanê sîyasîyan ê tirkan, nîjadperestan, faşîstan û tay nuştoxan nameyê Şêx Seîdî xo rê kerde babeta nîqaşî. Serekê Pêroyî yê Komelê Îslamî yê Kurdîstanî (CÎK) Hafiz Ahmet Turhalliyî derheqê babete de ANFyî rê qisey kerd.

Turhalliyî ard ziwan ke dewletanê kolonyalîstan tim kurdî xapînayê û vat: ''Şaredarê Amedî yê ê çaxî Birêz Osman Baydemîrî nameyê Şêx Seîdî dabi bulwarî ro. La seke name newe dîyayo bulwarî kewto rojdem. Dewlete weçînayîşanê herêmîyan ra verî peyê kayan de ya, peyê xapînayîşê şarî de ya. Partîyê îqtîdarî û şirîkê ci kenê ke nameyê Şêx Seîdî ser o zerrîya kurdan weş bikerê. Yanî binê nameyê wayûbiratîya Îslamîyetî de naye kenê. La na zûr a. Nameyê bulwarî hetê BDPyî ra dîyabi. Qeyûman nameyê kurdayetîye ser o çi est o xirab kerdo. Nê senî wayîrê Şêx Seîdî vejîyê? No kayê înan ê xapînayîşî yo.

Şêx Seîd erjêkê kurdan o girîng o û serkêşê têkoşînê kurdan o. Tay kemalîst û nuştoxî şexsê Şêx Seîdî de heqaretê kurdan kenê. Ê kesê bînî zî Şêx Seîd teyna bi rolê misilmanî qebul kenê û ey nasnameyê ci yê kurdayetîye ra dûrî visnenê. Tay kesan û kemalîstan îdîa kerd ke 'Şêx Seîdî îxanet kerdo.' A raşte dewleta tirke kurdan rê îxanet kerd.Wexto ke Komara Tirkîya ronîyabî Mustafa Kemal û embazanê ci soz dabi ke kurdan reyde welatêkê hemparî awan bikerê. La dima înan sozê xo rê îxanet kerd. Şêx Seîdî vera nê îxanetî dest pê têkoşînî kerd. Şêx Seîdî seba ke heqanê kurdan apey bigêro û verê zulmê serê kurdan bigêro sey erkêkê Îslametîye têkoşîn kerd.

Rejîmê Kemalîstî dima ke dewleta tirke awan kerde waşt ke kurdan înkar û îmha bikerê. Coka înan bi Terteleyê Dêrsimî dest pê qirkerdişan kerd. Şêx Seîdî vera ney sere wedarit. Pêxemberê ma vano 'Oyo ke ma xapîneno ma ra nîyo.' Îqtîdar û şirîkê ci ewro nameyê Şêx Seîdî ser o eşkerayîyan danê. La ganî hêverî ê cayê goranê Şêx Seîd û Seyîd Rizayî eşkera bikerê. Wekîlanê kurdan Meclîs de çend reyî seba ney vernîyazî dayî. La îqtîdarî red kerd. Wa şarê ma hol bizano ke îqtîdar wazeno ke şarê ma mîyanê sentezê wayûbiratîya Îslamîyetî de çin bikero. 

Şêx Seîd rixmo ke kokim bi ey qebul nêkerd ke şarê kurdî welatê xo de bêro înkarkerdene. Seba heqê kurdan ey têkoşîn kerd. Seba azadîya Kurdîstanî, vera dewletêka zulmkere ey têkoşînê heq û merdimatîye kerd. Şêx Seîd serkêş û erjêkê kurdan o.''