Temsîlkarê Şubeyê Amedî yê Weqfa Heqanê Merdiman a Tirkîya (TÎHV) Murat Abayî bi wesîleya Hewteyê Heqanê Merdiman  ANFyî rê qisey kerd.

Abayî îfade kerd ke goreyê doneyanê TÎHVî Tirkîya de hûmara merdimanê ke raştê îşkenceyê yenê zaf zêdîyaya. abayî vat: ''Heyf ke nê welatî de merdimî nêeşkenê qiseyêk zî vajê. Merdimî bi îdîaya 'propagandaya rêxistine' cade tepişîyenê. Tirkîya de asta berze de heqê qiseykerdişê merdiman yeno xespkerdene. Teda û hêrişê vera rojnamegeran zî zaf zêdîyenê. Ma nika Hewteyê Heqanê Merdiman de yê. Tirkîya de xebata yewrengîye yena kerdene. Xora ma verê ney vejîyenê. Ma vanê ke ganî ma yewbînan pê cîyatîyanê xo qebul bikerê.''

Temsîlkarê Şubeyê Amedî yê Weqfa Heqanê Merdiman a Tirkîya (TÎHV) Murat Abayî ard ziwan ke îqtîdarê AKP-MHPyî rêxistinê heqanê merdiman xo rê sey dişmenî îlan kerdê û goreyê ney têgêreno. Abayî vat: ''Seba ma huqûqê zereyî girîng o. Ça de heqêk bêro binpaykerdene ma do uca de bê. Beno ke îqtîdar her cayî ra tedaya ma bikero û xîret bikero ka vengê ma bibirno. La ma do vera ney zî têkoşîn bikerê. Ma do pirrrengîya komelî bipawê.''