Endamê Heyetê Rûmetî yê Merkezê Pêroyî yê ÎHDyî Akdemîrî vist vîrî ke Rayberê Şarê Kurdî Abdullah Ocalan serra 2021î ra nata binê tecrîdêkê giranî de yo û vat ke ne qanûnanê Tirkîya ne zî qanûnanê dinya de tecrîdêko winayên est o.
Endamê Heyetê Rûmetî yê Merkezê Pêroyî yê ÎHDyî Şevket Akdemîrî derheqê tecrîdê vera Rayberê Şarê Kurdî Abdullah Ocalanî de ANFyî rê qisey kerd.
Akdemîrî vist vîrî ke Rayberê Şarê Kurdî qasê 3 serrî yo binê tecrîdêkê giranî de yo û vat: ''Abdullah Ocalan sey her kesî wayîrê heqan o. Ganî o zî hewte de yew bi telefonî qisey bikero, pêvînayîşê têrîyî û normalî bikero. No heq qanûnanê Tirkîya û dinya de est o. Tecrîdê vera Ocalanî dûştê qanûnan o, dûştê Qanûnê Bingeyînî yo. Ewro teyna qiseyêkê Birêz Ocalanî zî eşkeno nefesêkî bîyaro Tirkîya. Seba ke no şerê 40 serran nêqedîyeno ekonomîya Tirkîya bin kewena. Ganî Yewîya Baroyan zî vera tecrîdî têbigêra. Ganî partîyê sîyasîyî û heskerdoxê welatî vera tecrîdî tewir bimojnê û seba akerdişê rayîrê haştîye têkoşîn bikerê.
Eke tecrîdê vera Abdullah Ocalanî wedarîyo û meseleya kurdan çareser biba Tirkîya do biba welatêko zengîn. Çimeyê pêro meseleyanê Tirkîya no tecrîd û meseleya kurdan ê. Meseleya kurdan meseleya demokrasî ya. Ewro wekîlêk eşkerayîyêke dano la tepişîyeno. Goreyê qanûnan heqê destnêdayîşê wekîlan est o. La meseleya kurdan ra nê kerdişî qewimîyenê. Fikrê Abdullah Ocalanî musbet ê. Eke haştîye bêra her kes do nefesêkî bigêro. Ganî merdimî fikranê Ocalanî ra nêtersê. Ganî tecrîd biqedo.''
