Roja Ziwanê Dayîke: Ma wayîrê kurdkî bivejîyê

Bi wesîleya Roja Ziwanê Dayîke Dêrsim de panelêk ame kerdene. Reyna xeylêk bajaran de aktîvîteyî ameyî kerdene û mesajê wayîrvejîyayîşê kurdkî ameyî dayene.

Bajaranê Vakûrê Kurdîstanî û Tirkîya de bi wesîleya 21ê Sibate Roja Ziwanê Dayîke ya Dinya aktîvîteyî ameyî kerdene. Aktîvîteyan de hêrişê îqtîdarê AKP-MHPyî yê vera kurdkî ameyî şermezarkerdene û kurdan rê ame vengdayene ke wayîrê ziwanê xo bivejîyê.

Rêxistina HDPyî ya Dêsimî banê partîye de panelêk organîze kerd. Wekîlê HDPyî Alîcan Onlu û Kemal Bulbu û Ziwannas Narîne Gezgor tewrê panelî bîyî. Pankarta ke bi kirdkî ser o ''Eke yew ziwan bibo vîn, yew şar zî mirêno'' nuştebi ameye akerdene.

Alîcan Onlu bi kirdkî qisey kerd û vat: ''Komel bi ziwanê xo esto. Semedê nayî zî na herre de xeyêk mucadele ame kerdene. Kedkarê tewr pîlî yê nayî îdareyê ma yê cayîyî yê. Bêşik o ke vînîbîyayîşê yew ziwan de rolê dewlete û sîstemî pîl o la nayî de kêmîya ma zî esta.  Ma ziwanê xo keye, cuye her ca de nêşuxulnenê.  Heto hîna komelkî zî sîyasetmedarê ke nê şarî temsîl kenê kurdkî nêşuxulnenê. Reyna komele ke semedê komelî estê ê zî kurdkî nêşuxulnenê. Seba ke ma kêmayîye werte ra wedarê ma dest pê kursê ziwanî kerd. Partîyê ke bi nameyê nê şarî sîyaset kenê ganî pê ziwanê xo xizmet bikerê.''

Narîne Gezgor  zî vat: ''21ê Sibate semedê şarê kurdî roja bimbarekkerdişî nê roja mucadeleyî ya. Tirkîya de polîtîkaya 'yew ziwan', 'yew dînî' yena rayraberdene. Kurdîstan de nameyê xeylêk dew û bajaran ameyî bedilnayene, eslê ci ra ameyî dûrîfînayene. Ganî rixmê heme zextan ma wayîrê ziwanê xo bivejîyê. Ziwanê ma estbîyayîşê ma yo. Têna yew roje nê ganî ma tim wayrîê ziwanê xo vejîyê. Eke ziwanê  ma bibo vîn kultur, cuya û fîkrê ma benê vînî.''

Kemal Bulbulî zî vat: ''Ziwanê dayîke heq o. Astengkerdişê perwerdeyê ziwanê dayîke sûc o.''

Amed de zî Komeleya Cigêrayîşê Kultur û Ziwanî ya Mezopotamya  (MED-DER) banê xo de eşkerayîyêke daye. Eşkerayîye kurmanckî hetê Elmase Kan, kirdkî zî hetê Rezan Aktulumî ra ameyî wendene. Eşkerayîye ame vîrardene ke tabelayê kurdkî hetê hukmatî ra ameyî wedarnayene  dezgeh û komelê kurdan ameyî qefilnayene û hêrişê îqtîdarî ameyî şermezarkerdene.

Reyna Şirnex, Êlih, Riha, Îstanbul, Îzmîr, Adana, Mersin û xeylêk bajaranê bînan ê Kurdîstan û Tirkîya de hetê HDP, TJA û dezgehanê ziwanî ra pê aktîvîteyanê cîya cîyayan bale ameye antene muhîmîya ziwanê dayîke ser û hêrişê hukmatî yê vera kurdkî ameyî şermezarkerdene. Qiseykerdişan de ame waştene ke qedexeyê vera kurdkî bêro wedaritene û bibo ziwanê perwerdeyî. Reyna kurdan rê ame vengdayene ke wa her warê cuye de bi ziwanê xo qisey bikerê û domananê xo rê kurdkî bimusnê.