Hemsereka Komeleya Teqîbkerdiş û Cigêrayîşê Koçî ya Mezopotamya (GOÇÎZDER) Medya Alkan derheqê polîtîkayanê koçkerdişî yê vera kurdan de ANFyî rê qisey kerd.

Medya Alkan pare kerd ke polîtîkayê şerê taybetî sebebê esasî yê koçkerdişê kurdan o û vat: ''Rîyê polîtîkayanê qeyûm, talan, teda û ekonomîkan ê îqtîdarî ra kurdî neçare manenê ke koç bikerê. Bi taybetî prosesê weçînayîşan ra dima mîyanê ciwanan de koçkerdişê zafî qewimîyayî. Ma eşkenê ciwananê xo rê waranê cuye yê neweyan awan bikerê û bi nê hawayî verê koçkerdişî bigêrê. Prosesê koçkerdişî yo nikayên dewamê polîtîkaya koçkerdişî ya serranê 90an o. Seba ke cografyaya Kurdîstanî bêra vengkerdene, şarê kurdî bêîrade bimano û erdê xo terk bikero polîtîkayê koçkerdişî yenê kerdene. 

Hetê bînî ra koçkerdişî parçeyê polîtîkayanê asîmîlasyonî yê zî. Îqtîdar wazeno ke kurdî erdê xo ra şorê. La ganî ma erdê xo meteriknê û wayîrê erdê xo vejîyê. Ma kenê ke vera koçkerdişî xebatan bikerê la heyf ke qeyûmî û dewlete verê xebatanê ma gênê.''

Alkane da zanayene ke bi taybetî herêma Serhedî û Amedî ra ver bi Ewropa koçkerdişê girîngî yenê kerdene û vat: ''Nê cayan de yew meseleya şebekebîyayîşî ya cidîye est a. Ma kenê ke bi xebatanê xo nê şebekeyan eşkera bikerê. Ma bi cigêrayîşê xo dî ke 9 menganê verênan ê 2023yî de 51 hezar û 415 kesan seba îltîca muracatê Ewropa kerdo ke se ra 80ê înan ciwanê kurdî yê. Ma seba erdê xo têkoşîn kenê. Bêrê ma pîya wayîrê erdê xo vejîyê, erdê xo terk mekerê û pîya erdê xo weye bikerê.''