Namzedanê Partîya Çep a Keske yê Qersî ra Gulcane Alp derheqê xebatanê înan ê weçînayîşan de ajansê ma rê qisey kerd.

Gulcane Alp îfade kerd ke Qers de ê cinîyan reyde mil bi milî xebitîyenê û cinîyî wayîrê Partîya Çep a Keske vejîyenê. Alpe vat: ''Ma do cinîyan reyde ser bikewê. Nê weçînayîşan ra rima peynîya vêşanîye, xizanîye, tecrîd, tepiştiş, heqaret û îşkenceyî do bêra. Ma şarê xo reyde, cinîyan û ciwanan reyde vurîyayîşî rê amade yê. Ma do bikerê ke bi xurtî bikewê Meclîsî û îradeyê şarê xo temsîl bikerê. Çarçewa xebatan de ma keye bi keyeyî gêrenê, her kesî rê qala demokrasî kenê. Zor û zehmetîyî nêeşkenê hêzê ma bikêmînê.''

Alpe ard ziwan ke Qers bi xoza, tarîx û rindîya merdimanê xo cayêko winayên o ke ganî her kes bivîno. Alpe vat: ''Şarê Qersî keno ke dejanê erdlerzî weş bikero, hêvîdar o. Ma pêro dînamîkanê şaristanî de, rêxistinanê komelê sivîlî û dezgehan de pêvînayîş kenê. Esnafan zîyaret kenê. Şarê ma vurîyayîşî rê amade yo. Ma tîya de yê. Partîya Çep a Keske mîyanê şarî de yo. Ma eşkenê bivurnê. Wa her kes raya xo bido û wayîrê raya xo vejîyo.''