Serekkomaro Tirk Recep Tayyîp Erdogan cuwa ver vatêne Tirkîya de 3,6 mîlyon multecîyê Surîyeyîjî ciwîyenê û tim propagandaya naye keno. Hûmara na hewte ya kovara xeberan a Der Spîgelî de ame zanayene ke Erdogan hûmara Surîyeyîjan zêdêr mojneno.

Merkezê Pêkerdiş û Cigêrayîşê Koçî yê Almanya Franck Duvell vat, eqsê eşkerayîyanê Erdoganî û selahîyetdaranê Tirkî, Tirkîya de hûmara multecîyanê Surîyeyîjan mabênê 2,7 mîlyon û 3 mîlyonan de ya. Pisporê koçî yê Almanya eşkera kerd ke na hûmara hetê Komîserîya Berz a Multecîyan a Neteweyê Yewbîyayeyî (UNHCR) û Mudirîya Pêroyî ya Îdarekarîya Koçkerdişî yê Wezaretê Zereyî yê Tirkî ra ameye amadekerdene la îstatîstîkê ke heta nika nêameyî weşanîyene înan ardê pêser. Mabênê na hûmara ke dezgehê Tirkî û dezgehê mîyanneteweyî weşan kenê, zaf cîyatî esta. Sûrîyeyîjan ke nika ra ver Tirkîya de ciwîyayêne agêreyê welatê xo yan zî şîyê Ewropa pêro tewrê na hûmara kenê ke Erdogan behsa ci keno.