Amed de serkêşîya Platformê Kede û Demokrasîyî de 1ê Gulane Meydanê Şêx Seîdî de ame pîrozkerdene. Şayîye de pankartê  “Parastin dê serî netewîne”, “Heta kede medîyo, azadîye nêbena”,  “Bijî Yek Gulan”, “Bi berxwedana jinan bihar wê bi gulanê te were”  ameyî akerdene.

Bi nameyê Komîteya Amadekerdiş, Siraç Çelîkî bi lehçeyê kirdkî/dimilkî yê kurdkî qisey kerd. Çelîkî bale ante operasyonanê qirkerdişê sîyasîyî ser û vat şar do 14ê gulane de cewabê nê îqtîdarî bido.

Dima ra bi kurdkî û tirkî eşkerayîye ameye wendene. Eşkerayîye de wina ame vatetene: "Ma sond wanenê ke her ganîyê/a ke cuya xo vînî kerde, rijnayîşê ke rîyê polîtîkayanê rantî ra qewimîyayî, rew ya zî erey ma do hesabê înan bipersê."

Hemserekê HDPyî yê Amedî Zeyyat Ceylanî zî vat: "Ma do 24ê gulane bikerê roja xoverdayîş û serkewtişî û nê îqtîdarî bixelisîyê. Hêrişê serkewtişanê HDPyî kenê, bi seyan embazê ma eştî zîndanan. Ê se kenê wa bikerê ma do 14ê gulane de înan bin bifînê. Ma do semedê haştîye û azadîye, semedê azadîya Kurdîstanî îqtîdarê AKP-MHPyî ra hesab bipersê. Ma do 14ê gulane de rayîrê haştîya birumete akerê."