Erdlerzê 6ê Sibate de Amed de xeylêk bînayan xisar dîbî, bi seyan kesan dinyaya xo bedilnabî. Erdlerzî ra dima Amed de 3 hezar û 200 bînayê xesarênî ameybî tesbîtkerdene. Ganî nê pêro biameyêne rijnayene la heta nika teyna 80ê ci yanî se ra 3ê ci ameyî rijnayene. Nê bînayê xisarênî şaristan de tehlukeyê pîlî yê. 

Hemserekê Odaya Muhendîsanê Înşaetî ya Amedî Mahsûm Çiya Korkmazî derheqê babete de ANFyî rê qisey kerd û waşt ke bînayê xesarînê ke benê sebebê astbestî wa cade bêrê rijnayene.

Korkmazî îfade kerd ke qezayanê Amedî de 80 hezar bînayan de xisar ameyo tesbîtkerdene labelê îtîrazan ser o no proses reya diyîne ameyo kerdene. Korkmazî vat: ''Coka proses bîyo derg. Karê tesbîtkerdişî mengêke û nême ra verî qedîya. Goreyê tesbîtan 3200 bînayî bi xisar ê. Îhaleyê rijnayîşê nê bînayan hêverî dîya Şaredarîya Amedî la dima dîya walîtîye. Seba rijnayîşê taxan îhale ameye kerdene û na îhale zî 10 rojî verî qedîyaye. Nika ganî bînayî bêrê rijnayene.''

Korkmazî da zanayene ke karê rijnayîşî zaf giran yeno kerdene. Korkmazî vat: ''Heta nika teyna 80 bînayî ameyê rijnayene. Eke wina dewam bikero karê rijnayîşî bi serran do nêqedo. Nê bînayê xisarênî cayê trafîkî de yê, wayîrê rîskanê pîlan ê. Kolonê înan teqayê. Bi lerzayîşêkê qijî yan zî bi trafîkê wesayîtan zî nê bînayî beno ke birijîyê. Karê rijnayîşî ganî goreyê îdarenameyê rijnayîşî yê Wezîrîya Dorme û Şaristanîye bêrê kerdene. Nê îdarenameyî de bi zelalî yeno vatene ke ganî qatanê cêrînan ra rijnayîş dest pênêkero. Labelê ma vînenê ke eqsê ney hêverî kolonê qata jêrîne yenê teqnayene û bîna wina yena rijnayene. Ê kenê ke tehlukeyêkî wedarnê la tehlukeyêkê bînî afernenê.''