Operasyonê qirkerdişê sîyasîyî yê ke ewro ameyî kerdene de bi desan kesî ameyî destbendkerdene û derheqê bi desan kesan de qerarê destbendkerdişî est o. Partîyanê sîyasîyan û rêxistinanê sîvîlan Amed de qirkerdişo sîyasî protesto kerd.

Çalakîya protestoyî ke Yenîşehîr de ame kerdene de polîsan şar girewt binê ablûqa û kerd ke verê çalakîye bigêro la çalakwanan peyser game nêeşte. Şar heta verê Buroyê Vîjnayîşî yê Partîya Çep a Keske yê Ofîsî rayra şi û tîya eşkerayîye ameye dayene. 

Wekîlê HDPyî yê Êlihî Ruştu Tiryakîyî binê ablûqaya polîsan de eşkerayîye daye. Tîryakîyî vat: “Avukatan, îdarekaranê partîyan, hunermendanê tîyatroyî destbend kenê. Vanê qey wina eşkenê sîsayetî rayra berê. Ma nê protesto kenê, çirey qebul nêkenê.”

Vervatoxê Partîya Çep a Keske Îbrahîm Akin zî vat: “Ma rixmê heme operasyonan û astengîyan tîya xover danê û kenê ke vengê xo bidê eşnawitene. Ewro sere de Amed xeylêk bajaran de operasyonê qirkerdişî  ameyî kerdene û hunermendî, avûkatî û hemkarê hemserekanê ma yê HDPyî ameyî destbendkerdene. Nê embazê ma ke  ameyî destbendkerdene ma pîya xebatê vîjnayîşî rayra berdêne. Ma tîya ra reyna veng kenê îqtîdarî; ma do şima 14ê gulane de bişawê û hesabê nê kerdişan şima ra bipersê. ”

Şar gama ke bi sloganan vila bi raştê hêrişê polîsan ame. Xebatkarê çapemenîye yê HDPyî û Tumen Anli û endamê ESPyî Serhat Eren ameyî destbendkerdene.