Rayraşîyayîşê Azadîye yo Pîl o ke seba azadîya Rayberê Şarê Kurdî Abdullah Ocalanî 1ê sibate de dîyabi destpêkerdene roja 13ine de resa Amedî. Qefleyê Qers û Wanî Amed de ameyî têhet.

Raywanê Azadîye verê Merkezê Bazirganîye yê Ceylanlarî de coşî pîlî ameyî pêşwazîkerdene. Şar bi erbana, deyîre, slogan û tîlîlîyan raywanî pawitî. Polîsan herême girewte binê ablûqa. Gama ke çalakwanî ameyî polîsan waşt verê înan bigêro û tengijyayîş vejîya. Parlementeran destê yewbînan girewt û vera astengkerdişê polîsan vejîyayî.

Hemserekê Pêroyî yê DBPyî Keskin Bayindirî ke wextê çalakîye de qisey kerd, vera hêrişan hêrsê xo ard ziwan û vat: ''No rayraşîyayîş do bireso armancê xo. Ma heta ewro verê zextanê şima de milê xo çewt nêkerd, ma do ewro ra tepîya zî çewt nêkerê.''

Parlamentera DEM Partî Newroze Uysal zî vat: ''Semedê ma her kuçeyê Amedî warê çalkîye û rayraşîyayîşî yo. Ma do kuçe kuçe rayra şirê û waştişê rayraşîyayîşî bîyarê ziwan.''

Dayîkanê Haştîye bi laçikanê xo yê sipîyan ablûqaya polîsan ra ravîyartî û vilîkî dayî çalakwanan. Dayîkan pîya bi raywanan deyîrî vatî. Warê çalakîye ra sloganê "Bijî berxwedana İmraliyê", "Bijî berxwedana zindanan" bîyî berz. Şarî balkonanê xo ra paştî daye raywanan.

Bado ke polîsan hêrişê çalakîye kerd parlamenteran rayîr trafîkî rê birna. Çalakwanan bi hewayêkê qerardarî xover da, naye ser polîsan ablûqa wedarit  û rayraşîyayîşî dest pêkerd û heta qezaya Sûrî dewam kerd.

Bi hezaran polîsan wextê rayraşîyayîşî de çalakwanî binê ablûqa de tepiştî. Rixmê heme zextan rayraşîyayîş bi coşî ame kerdene û şarî balkon û kuçeyan de raywanî selam kerdî. Mabênê Oryil Petrol û semtê Ofisî de bi seyan kesan Raywanê Azadîye bi slogana “Bijî Serok Apo” pêşwazî kerdî.

Tîya polîsan reyna hêriş kerd. Ciwanan kuçeyan sloganan rê dewam kerd. Badê rayraşîyayîşê çar saetan çalakwanê ke resayî Kuçeyê Gazîyî  dima ra heta Mînareya Çarlinge rayra şîyî.

Tîya eşkerayîye ameye dayene. Newroze Uysal vat: ''Ma nê serd û sipîrî de Wan û Qersî ra kewtî rayîr. Semedê azadîya Birêz Ocalanî û çareserîya meseleya kurdan heta tîya ameyî.  No rayîr rayîrê azadîye yê Birêz Ocalanî yo.''

Keskîn Bayindirî zî nê vat: ''Ganî meseleya kurdan bi rayîrê demokratîkî bêro çareserkerdene. Muxatabê na mesele Birêz Ocalan o. Seserrî yo ke bi polîtîaya qirkerdiş, înkar û îmhayî yena rayraberdene. No rayraşîyayîş yê 13 rojan nîyo, seserrî verî dest pêkerd. Serkêşê nê rayraşîyayîşî Birêz Ocalan o. Ganî tecrîd bêro wedaritene û Birêz Ocalan bibo azad. Yewna rayîr çîn o. Kam ke nê welatî de haştîye wazeno ganî destê xo bikero binê kerra.''

Eşkerayîye bi sloganan û firnayîşê borûnanê haştîye  qedîyaye.  Rayraşîyayîş do 15ê sibate de dewa Amara de biqedîyo ke Rayberê Şarê Kurdî Abdullah Ocalan tede ameyo dinya.