Namzedê Partîya Çep a Keske Amedî ra heta Dêrsimî, Xarpêtî ra heta Çewlîgî xebatanê weçînayîşî rê dewam kenê. Şar bi coşî namzedan pêşwazî keno û mesajê ''Yew raye Çepa Keske rê, aya bîne Kiliçdarogluyî rê'' dano.

Amed

Namzedan Serhat Erenî û Samet Enguçî qezaya Farqînî de esnafî zîyaret kerdî û şarî de kombîyayîş kerd. Bi taybetî doman û dadîyan pê alanê Partîya Çep a Keske namzedî pêşwazî kerdî. Namzede Ceylane Akça û Hemserekê HDPyî yê Amedî Zeyyat Ceylanî zî qezaya Hezroyî zîyaret kerde. 

Çewlîg

Namzedanê Partîya Çep a Keske dewê Dewa Cêrîne, Mûmîn, Şebanan, Korman û Çirîsî zîyaret kerdî. Şarî eleqeyêko pîl mojna namzedan. Heyetî dewijan de sohbet kerd û rayê înan waştî. Dewijan pare kerd ke ê wazenê cade îqtîdarê AKP-MHPyî ra bixelisê.

Dêrsim 

Namzede Aytene Kordu dewê Kanik, Xosor, Sorpîyan, Pulê Çayirî û Karmezî zîyaret kerdî, yew bi yewe berê keyeyan cinitî û şarî reyde sohbet kerd. Zîyaretan de broşurê partîye zî ameyî vilakerdene. Wextê zîyaretî de dewijêkî/e vat: ''Armancê ma zelal o; yew raye Partîya Çep a Keske rê, aya bîne Kiliçdarogluyî rê. Ma nê zulmî ra bixelisê.''

Dewan ra dima heyetî DAD zîyaret kerd. Hemsereka DADî Kadrîye Dogan zîyaret de vat: ''Dêrsim wa Partîya Çep a Keske ra wekîlîye vejo.'' Aytene Kordu zî qisey kerd û vat: ''Dêrsim şaristanê elewîyan o. Ma do bikerê ke pîya derheqê bawerîya xo de xebatan bikerê. Ma do polîtîkaya asîmîlasyonî ya dewlete vejîyê.''

Xarpêt

Qezaya Yazikonakî de bi beşdarîya namzedan Sultane Yaray, Nûrşate Yeşîl û Savaş Erdoganî buroyê weçînayîşî ame akerdene. Akerdiş de sloganî ameyî berzkerdene û akerdiş vurîya mîtîngî. Namzedan akerdiş de qisey kerd û da zanayene ke cinîyê kurdî serkêşîya serkewtişê weçînayîşî kenê. Namzedan ard ziwan ke ê do pê serkewtişê weçînayîşî berê zîndanan abikerê. Namzedan dima bajarekê Yurtbaş û Mollakendî zîyaret kerdî.