Dezgehê Tipê Edlîyî (ATK) reya hîrêyîne raporê 'eşkena zîndan de bimana' da sîyasetmedara kurde Aysele Tugluk. Avûkatan da zanayene ke ê do raporî rê îtîraz bikerê.

Avûkatanê Aysele Tugluk derheqê babete de eşkerayîyêka nuştekîye daye. Eşkerayîye de ame vîrvistene ke rewşa weşîya Tugluke zaf giran a û tede nêweşîya demansî est a. Avûkatan pare kerd ke Tugluke nêeşkena bi sereyê xo hewcedarîyanê xo bîyara ca. 

Avûkatan dîyar kerd ke rixmê ATKyî dezgeh û nêweşxaneyanê bînan raporê 'nêeşkena zîndan de bimana' dayê Tugluke û vat: ''Raporê ATKyî yo peyên objektîf û zanistî nîyo. No rapor nakok, terefgîr, bêdelîl o.''

Eşkerayîye de ca dîyayo fikranê pisporanê TÎHVî. TÎHVî eşkerayîye de nê çîyî vatî: ''Rewşa Tugluke goreyê verî hîna bîya giran. A na asta nêweşîye de nêeşkena holî-xirabî, raşt-xelat cîya bikera, bi sereyê xo qeraran bigêra û bîyara ca.''

Eşkerayîye de ame îfadekerdene ke Mehkemeya Qanûnê Bingeyî (AYM) derheqê muracatê avûkatanê serê tedbîran de birêke nêdaya.