Goreyê doneyanê Komeleya Heqanê Merdiman (ÎHD) zîndanan de hezar û 517 nêweşê tepişteyî est ê ke nînan ra rewşa 651 tepişteyan giran a.

Hemvervatoxê Komîsyonê Zîndanan ê Merkezî yê ÎHDyî Yusuf Erdoganî derheqê babete de ANFyî rê qisey kerd.

Avûkat Erdoganî ard ziwan ke ê tim xîret kenê ke binpaykerdişê heqanê merdiman ê zîndanan tesbît bikerê, rapor bikerê û seba qedînayîşê nînan xebatan kenê. Erdoganî vat: ''Bi taybetî wextê peyênî de xeylêk meseleyê zîndanan est ê û nînan de heqê merdiman bi giranî yenê binpaykerdene. Zîndanan de kerdişê sey tecrîd, îzoloasyon, îşkence, astengkerdişê heqan, surgun ûsn. est ê. Ancî bi raporanê Heyetanê Çimdarîye û Îdareyî yê Zîndanan înfazê tepişteyan yenê vêşnayene.''

Yusuf Erdoganî pare kerd ke derheqê veradîyayîşê tepişteyanê nêweşan de sere de Wezîrîya Edaletî dezgehê dewlete raporanê objektîfan amade nêkenê û aqîbetê tepişteyanê nêweşan Dezgehê Tipê Edlîyî ra verdîyenê. Erdoganî vat: ''Raporanê 'nêeşkenê zîndan de bimanê' yê Dezgehê Tipê Edlîyî ra xeylêk tepişteyê nêweşî zîndanan de dinyaya xo bedilnenê. Dezgehê Tipê Edlîyî seba veradîyayîşê tepişteyanê nêweşan bîyo cayê qeraran. Dewlete û îdarekarî ganî astengîyanê verê veradîyayîşê tepişteyanê nêweşan wedarnê. Ganî Dezgehê Tipê Edlîyî nêbo tek cayê qerarî. Ganî tepişteyê nêweşî bê şert û mercî vera bidîyê.''