Avûkatanê Buroyê Asrinî seba ke 'bi lezî' muwekîlê xo Rayberê Şarê Kurdî Abdullah Ocalanî û tepişteyanê bînan ê Îmraliyî Omer Hayrî Konar, Hamîlî Yildirim û Veysî Aktaş bivînê muracatê Komîsyonê Cigêrayîşê Heqanê Merdiman ê Meclîsê Tirkîya kerd.

Avûkatan bale ante ser ke muwekîlê înan bi hawayêkê bêhuqûqî yenê îzolekerdene, teberî ra xebere nêgênê, heqê înan ê têkilîye yenê astengkerdene. Avûkatan da zanayene ke nê kerdişî dûştê norm, mewzuat, peyman û qanûnê neteweyî û mîyanneteweyîyan ê.

Avûkatan muracat de waşt ke derheqê weşîya muwekîlanê xo de qerqilîyenê coka wazenê cade înan bivînê. Avûkatan muracat de ard ziwan ke 8 mengî yo ê nêeşkenê muwekîlê xo Ocalanî bivînê. Avûkatan waşt ke peynîya na rewşe bêra ardene û ê hînî muwekîlanê xo reyde bi hawayêkê fîzîkî pêvînayîşî bikerê.

Avûkatan muracatê xo de vat: ''Komîsyon wayîrê ê selahîyetan ê ke zîndanan de cigêrayîş bikerê, agahîyan îdareyê zîndanî ra biwazê. Ma wazenê Komîsyon Zîndanê Îmraliyî de cigêrayîş bikero, peynîya qesawetî bîyaro û bikero ke avûkat û keyeyî tepişteyan bivînê.''

Pêvînayîşê telefonî yê Rayberê Şarê Kurdî ke 25ê adare de birayê xo Mehmet Ocalanî reyde kerd nêmcet mendbi. Hela ke înan qisey kerdêne telefon bîryabi. Nê pêvînayîşî ra nata Ocalanî ra xeberêke nêameye girewtene.