Buroyê Huqûqî yê Asrinî  muracatê Komîteya Vergirewtişê Îşkenceyî (CPT) ya Konseya Ewropa kerd.

Waştişnameyê muracatî de avûkatanê buroyî da zanayene ke mabênê aşmanê gulane û temmuze de înan 24 reyî seba pêvînayîşê avûkatan, 12 reyî seba pêvînayîşê keyeyan muracat kerdo la cewab nêdîyayo muracatan.

Avûkatan pare kerd ke mektubî nêdîyenê muwekîlanê nînan û muwekîlê înan nêeşkenê heqê xo yê telefonî bişuxilnê.

Avûkatan pê hesna ke 4ê temmuza 2024î de ancî cezaya dîsîplînî dîyaya Rayberê Şarê Kurdî Abdullah Ocalanî la drheqê nê cezayanê dîsîplînî de agahîye nêdîyaya avûkatan.

Waştişnameyê muracatî de wina ame vatene: ''Her çiqas CPT Îmrali zîyaret keno zî derheqê zîyaretan de agahîye nêdano. 40 mengan ra zêdeyêr o Birêz Ocalan û muwekîlanê ma yê bînan ra xeberêke nêna girewtene. Têkilîya bi keye, avûkatan û dinya birîyaye. Bi taybetî proseduro ke madeya 10/2yê komîte de yo, nêno caardene. La senî vera Azerbaycanî prosedur ameyo caardene vera Tirkîya zî bêro caardene. Çunke Îmrali de rejîmê îşkenceyê sîstematîkî dewam keno. Ma venga şima danê ke wa peynîya rewşa incommunicadoyî bêra ardene.''

Avûkatan muracat de nê çîyî waştî:

''-Wa bi ad hoc (xoser) Îmrali bêro zîyaretkerdene. 

-Wa cade keye û avûkatî bieşkê şorê Îmraliyî.

-Vera rewşa incommunicadoyî tedbîrî bêrê girewtene û madeya 10/2yî vera Tirkîya bêra caardene.''