Goreyê xebera Ajansê Mezopotamya rê Buroyê Huqûqî yê Asrinî seba Rayberê Şarê Kurdî Abdullah Ocalanî û 3 tepişteyanê bînan ê Îmraliyî Veysî Aktaş, Omer Hayrî Konar û Hamîlî Yildirim ancî muracatê Komîteya Vergirewtişê Îşkenceyî (CPT) kerd.

Muracat de qalê serebûtanê 1ê Sibate-30ê Nîsana 2024î ame kerdene.

Muracat de ame parekerdene ke mabênê nê tarîxan de avûkatan 25 reyî û keyeyan zî 12 reyî seba pêvînayîşî muracat kerdo û cewab nêdîyo nînan.

Muracat de ame vîrvistene ke 28ê adare de ancî cezaya dîsîplînî ya hîrê mengan dîyaya muwekîlanê înan û 12ê nîsane de zî ceza qetî bîya. Buroyê Huqûqî yê Asrinî bale ante ser ke muwekîlê înan Veysî Aktaşo ke 30 serrî yo zîndan de yo, 28ê nîsane de veradîyayîşê ci serrêke ameyo taloqkerdene.

Muracat de dîya zanayene ke seba ke keye û avûkatî nêeşkenê pêvînayîşî bikerê şar û rayaumûmîye de Îmraliyî ser o qesawetî zêdîyayê. Muracat de ame parekerdene ke tepişteyan vera tecrîdê Îmraliyî grevê xo yê vêşanîye 4ê nîsane de kirişto safhaya diyîne.

Avûkatanê Buroyê Huqûqî yê Asrinî muracatê xo de vera CPTyî nêrazîbîyayîşê xo mojna û îfade kerd ke ganî CPT seba wedarîyayê tecrîdî têbigêro.

Waştişê Avûkatan

Avûkatan muracatê xo de nê çîyî waştî:

''-Seba veradîyayîşê Veysî Aktaşî wa xîretî bêrê kerdene. Ganî 'prosesê qanûnîyî' bi zelalî bêrê caardene.

-Wa CPT tesbît, çimdarî ûdoneyanê xo yê serê zîyaretê Îmraliyî yê 22yê êlula 2022yî cade rayaumûmîye de pare bikero. 

 -Wa cade CPT Zîndanê Îmraliyî zîyaret bikero.

-Wa şertê zîndanî goreyê rûmetê merdimatîye bêrê raştkerdene, pêvînayîşê bi keye û avûkatan bêrê caardene û qedexeyê sîstematîkî bêrê qedînayene.

- Seba wedarîyayîşê rewşa incommunicadoyî, şertanê xiraban, îşkene ûsn. wa tedbîrî bigêrîyê û prosedur goreyê madeya 10/2yî yê Peymane bêro raştkerdene.''