Tecrîdê vera Rayberê Şarê Kurdî Abdullah Ocalanî kewt menga 41ine. Sekretera Pêroyî ya Komeleya Huqûqnasan a Seba Azadîye (OHD) Ebruye Akkal 27ê temmuze de Komîteya Wezîran a Konseya Ewropa rê muracat kerdbî. Akkale derheqê babete de ANFyî rê qisey kerd.

Derheqê argumananê muracatî yê bingeyînan de Ebruye Akkal vat: ''Muracat seba caardişê biranê Mehkemeya Heqanê Merdiman a Ewropa (MHME) û seba agahdarkerdişî bi. Heman dosya ser o ma 2021 de zî 2 muracatî kerdbî. 27ê temmuze de OHD, ÇHD, CISST, TOHAV û THIVî muracat kerdç A raşte nê muracatî hem agahdarkerdiş hem zî cewabêk planê çalakîye yê Tirkîya bîyî ke pêşkêşê Sekreterîya Pêroyî ya Komîteya Wezîran kerd.

Ma bi muracatan armanc kerd ke bira 'heqê hêvîye' yê MHME wa bêra caardene. Tirkîya na babete de bire ne arde ca ne zî viste rojdemê Meclîsî. Ancî seba caadişê bira serê binpaykerdişê heqanê Ocalan, Gurban, Boltan û Kaytanî de tedbîrêko şexsî nêgirewt. Heqê hêvîye seba generalanê Darbeya 28ê Sibate û endamanê Hîzbullahî ame caardene.''

Akkale ard ziwan ke Komîteya Wezîran do roniştişê menga êlule de dosyayê Ocalan û Kaytanî, Gurban, Boltanî bivisna rojdemî û vat: ''Roniştişêkê Neteweyanê Yewbîyayeyan de tecrîdê Îmraliyî rojdem bibi. Tirkîya sey endamêka Konseya Ewropa û îmzadara Peymana Heqanê Merdiman a Ewropa wayîra a mesuldarîya ke goreyê krîteranê mîyanneteweyîyan têbigêra. 

Hetê bînî ra Tirkîya birê MHME yê serê Demîrtaş û Kavalayî zî nêardî ca. Xora birê serê Abdullah Ocalanî zî nêameyî caarene. Coka no prosesê kontrolî girîng o û do tesîrê dosyayanê bînan bikero. Ma wazenê ke prosesê caardişê biran bi xurtî bêro kontrolkerdene. Ma wina pawenê ke êlule de derheqê caardişê vurnayîşanê bingeyînan de Komîteya Wezîran biran bigêra. Ancî eke Tirkîya biran nêara ca ganî Komîte naye bikera rojdem. Coka girîng o ke dezgehê huqûqî û sivîlî na babete ser o muracatan bikerê. Komîte zî NY zî goş danê qiseyanê nê rêxistinanê komelê sivîlî. Babete eşkena tesîrê bi seyan, bi hezaran merdiman bikera. Coka ganî muracatê babete dewam bikerê.''