Avûkatanê Buroyê Huqûqî yê Asrinî yo ke pawitişê Rayberê Şarê Kurdî û 3 tepişteyanê bînan ê Îmraliyî kenê, semedo ke vîrusê Korona pêro dinya û Tirkîya de vila beno, 20ê adare de muracatê Serdozgerîya Komare ya Bursa, Mehkemeya Înfazî ya Nursa û Wezaretê Edaletî da û derheqê muwekîlanê xo de tay waştişî kerdî.

Avûkatan muracatan de rewşa weşîye ya nikayêne ya muwekîlanê xo ser o waştişê zanayîşî kerd û waşt ke heqê qiseykerdişê pê telefonî û ê bînan bêrê caardene.

Muracatî wina yê:

''1-Seke yeno zanayene eşkerayîya 11ê adara 2020î ya Wezaretê Weşîye ra dima rayaumûmîye rê ame parekerdene ke vîrusê Korona Tirkîya de vila bi. Ê wextî ra nata hûmara nêweşan û qurbanan bena zêdêr.

2-Ver tehlukeyê nêweşîya Korona, Wezaretê Edaletî da zanayene ke zîndanan de tebdîrî ameyî girewtene, seba zîndanan hacetê pakîye ameyî peydakerdene. Reyne ame vatene ke zîndanan de hacetê testê tesbîtkerdişî çin ê la tepişteyê ke înan ra şikê nêweşîye yeno kerdene do sewqê nêweşxaneyan bibê.

3-Mîyanê nê şert û mercan de hewceyêko mecbûrî yo ke ma derheqê muwekîlanê xo yê Îmraliyî de zanayîş bigêrê û çi tebdîrî ameyî girewtene bizanê.

4-Goreyê zanayîşanê ke resayî destê ma, personelê weşîye yê Îmraliyî meseleyanê weşîye yê muwekîlanê ma reyde eleqedar benê. Hetê bînî ra muwekîlê ma Birêz Ocalan serra 1999î ra nata seba weşkerdişî nêvejîya teberê Îmraliyî û nêame berdene bi dezgehêkê weşîye. Na rewşe serra 2015î ra nata seba muwekîlanê ma yê bînan zî ni heman hawayî dewam kena.

5- 7ê tabaxa 2019î ra nata avûkaran muwekîlanê xo reyde pêvînayîş nêkerd, derheqê rewşa weşîye ya muwekîlanê ma de zanayîşêk çin o. Ma tewr peyên 3ê adara 2020î pêvînayîşê keyeyan ra dima derheqê nînan de zanayîşî girewtî.

Eşkerayîye de waştişê girewtişê nê tebdîran ame kerdene:

A-Zîndanê Îmraliyî de verî ke pabeyê gumanê nêweşîye bêro vindertene, kontrolê weşîye yê muwekîlanê ma bêro kerdene û bi taybetî hacetê testî yê Covid-19î bêro peydakerdene, testê muwekîlanê ma bi hawayêkê nîzamî bêrê kerdene û derheqê netîceyanê ci de zî ma bêrê zanayîşdayene.

B-Madeyê pakîye, hîjyenî, lapikê tibbîyî, maskeyê tibbîyî, destmalê antîseptîkî û antîbakterîyek, awe û kolonyayî muwekîlanê ma rê bêrê dayene ke heqê nînan hetê ma ra do bêrê dayene.

C-Rewşa weşîye ya personelanê zereyî teberî yê zîndanî yê ke eşkenê xo biresnê muwekîlanê ma, tim bêra kontrolkerdene û testê înan ê Covvid-19î bêrê kerdene.

D-Personelê Zîndanê Îmraliyî dima ke resenê girawe seba tebdîrî kontrolî ra bêrê derbazkerdene.

E-Şert û mercê odayanê muwekîlanê ma semedê gefê nêweşîye ra bêrê serrastkerdene, seba hewayê pakî bêrê akerdene.

F-Seba ke personel û wezîfedarê ke gumanê nêweşîye tede estê nêkewê girawe, tebdîrî bêrê girewtene.

G-Ma wazenê zanayîşî ma rê bêrê dayene ke tebdîrê ke ameyî waştene bêrê caardene

Buroyê Huqûqî yê Asrinî heman wextî de waşt ke heqê qiseykerdişê pê telefonî û heqanê bînan ê muwekîlanê înan Abdullah Ocalanî, Hamîlî Yildirimî, Omer Hayrî Konarî û Veysî Aktaşî nêrê astengkerdene.