Wextanê peyênan de xeylêk gorê gerîlayan hêrişî yenê kerdene. Wekîlê HDPyî yê Çewlîgî Avûkat Erdal Aydemîrî babete berde rojdemê Meclîs û seba ke Wezîrê Karanê Zereyî Suleyman Soyluyî cewab bido ci vernîyazêkê persî pêşkêşê Meclîsî kerd.

Aydemîrî ard ziwan ke nê hêrişî rûmetê merdimîye şeqiznenê û ganî nê hêrişkeran rê ceza bêra dayene.

Aydemîrî vist vîrî ke tewr peyêne dewa Cafranî ya Çewlîgî de vera gorê gerîlayê HPGyî Engîn Kîşînî hêrişêk ame kerdene. Yildirmî pê feryadanê dadîya Engînî Hamşîye Kîşînî xîtabê Meclîsî kerd û vat: ''Na senî yew bêwijdanî ya? Êyê ke nê hêrişan kenê Yezîd ê, Muawîye yê, Merwan ê.''

Wekîlê HDPyî yê Çewlîgî Erdal Aydemîrî vernîyaz de nê persî persayî:

-Şima do derheqê texrîbatê goran de eşkerayîyêke bikerê?

-Kamî û çira pê nuşteyê kirdkî yê serê gorê Engîn Kîşînî qayîl nîyê?

-Dewlete ganî goran bipawê la kamî goran do hêzanê asayîşî yê dewlete ra bipawê?

-Sîstemî verê cû zî hêrişê goranê kurdan kerd. Na rewşa xirabe ya ke qet yew bawerîye de cayê ci çin o senî do bêra rastkerdene?

-Hêzê asayîşî fermanê texrîbkerdişê goran, gefwendişê keyeyan kamî ra gênê?

-Derheqê nê hezanê asayîşî de tehqîqatêk do bêro kerdene?