Bi wesîleya roja 40. ya erdlerzî Wêranşarê Meletî de  loqme  ame vilakerdene. Programo ke serkêşîya rêxistina HDPyî ya Meletî de ame organîzkerdene Hemsereka Pêroyî ya DBPyî Salîha Aydenîz û îdarekar û wekîlê HDPyî tewrê ci bîyî.

Aydenîze vat:  ''Afata xozayîye ciwîyayî la rîyê polîtîkayanê îqîtîdarî ra rijnayîşê wina gird bîyî. Îqtîdar bi xo binê nê rijnayîşî de mend. Wextê rijnayîşî de îqtîdar cayê şarî de nêbi. Roja verêne ra şarî vazdayî gazîya mexdûranê erdlerzî. Partîya ma rêxistinê komelê sîvîlî hetkarîya şarî kerde. Rixmo ke erdlerzî 40 rojî xo dima verdayî, hema zî birînî nêameyî piştene. Hema zî îqtîdar û dewlete semedê şarî çîyêk nêkerdo.

Rixmê hende dej û rijnayîşan îqtîdarî ra yew kesî zî îstîfa nêkerd. Înanê ke gerek rîyê rijnayîşî ra îstîfa bikerdêne ewro seba ke bibê namzed îstîfa kenê. No îqtîdar derdanê şarî rê derman nêbeno. Ma do pîya bi şarê xo heme dejanê xo bipêşê. Seba ke ma hesabê heme gananê xo bipersê ma do meydanan de bê. Sebebê girdbîyayîşê rijnayîşê erdlerzî  polîtîkayê rant û dişmenîya kurdan ê. Şarê ma do 14ê gulane de hesabê nê biperso.''