Vizêr Mayanê Haştîye Adalete Safali û Perîşane Akçelîk, Cîhan Akçelîk û avûkat Erdal Safali yê ke semedê îfadeyî Geverî ra şîyî Wanî, rayîrê agêrayîşî de qezayê trafîkî kerdbî. Qeza de Mayanê Haştîye Adalete Safali û Perîşane Akçelîk û lajê Akçelîke  Cîhan Akçelîkî dinyaya xo bedilnabî.

Semedê wird Dayîkanê Haştîye û Cihan Akçelîkî dewa Şahê de tezîye ameye ronayene. Hemsereka  Pêroyî ya DBPyî  Salîha Aydeniz û Hemvervatoxa Partîya Çep a Keske Çîgdeme Kiliçgun Uçar tezîye zîyaret kerd.

Aydenize poltîkaya zextî ya ke bi serran o vera kurdan yena rayraberdene vist vîrî û  vat: ''Wa sereyê şarê kurdî yê birumetî weş bo.  No qezayê trafîkî zî netîceya polîtîkaya dewleta tirke ya. Şar û dayîkê kurdan bi serran o semedê ameyoxê Kurdîstanî, haştîyêka birumete û yewîye têkoşîn kenê. Dayîkî bi laçikanê xo yê sipîyan kuçeyan de haştîye wazenê û têkoşîn kenê. Ma zî soz danê înan ke ma do nê laçikanê înan ê sipîyan tim berz bikerê. Ewro zerrîya ma dejena la hêrsê ma zafêr o. Heta serkewtişî ma do nê têkoşînî bidê domnayene.''

Badê qiseykerdişî heyetî pîya bi Dayîkanê Haştîye mezelî zîyaret kerdî. Dayîkanê Haştîye yê Wanî ra Zekîye Kaya ke tîya qisey kerd, nê vatî:  ''Nê dayîkan bi serran semedê haştîye, edaletî têkoşîn kerd. Ê şehîdê Kurdîstanî yê. Ma zî do heta peynî do têkoşîn bikerê.''

Zîyaretî ra dima heyetê şi banê Partîya Çep a Kesye yê Esendere  û tîya eşkerayîya çapemenîye daye. Dayîkanê Haştîye ra Zekîye Kaya ke eşkerayîye de qisey kerd, vat: ''Ma do sey Dayîkanê Haştîye tim semedê haştîye têkoşîn bikerê. Dayîkanê ma semedê vindarnayîşê gonî, têkoşîn kerd û nê rayîr de dinyaya xo bedilnaye.''

Hemvervatoxa Partîya Çep a Keske Çîgdeme Kiliçgun Uçar zî  bale ante têkoşînê haştîye yê Dayîkanê Haştîye ser û nê vatî: ''Kurdîstan de merdimê perûne zîndan de yê. Dayîkanê Haştîye seba ke domananê xo rê pere şawit, îfadeyê înan ame girewtene. Înan ke semedê îfadeyî venga dayîkan da do hesabê nê bidê. Ma do peyê nê cameverdê. Ganî vera nê zîhnîyetê dewlete ke nêwazeno meseleya kurdan çareser bikero, ma bibi yew. Ganî vengê haştîye ke Kurdîstanî ra berz beno, rojawanî ra zî veng bêro cidayene. Sereyê ma pêrune weş bo. Ma soz danê dayîkanê xo ke ma do heta serkewtişî têkoşînê înan bidê domnayene.''