Qezaya Tetwanî ya Bedlîsî de 17ê hezîrana 2023yî de polîs Engîn Kaplano ke merdimê Şaredarê Tetwanî yê AKPyî Mehmet Emîn Geylanî yo û pawitoxê Geylanîyî Yucela Baysaliyî hêrişê rojnameger Sînan Aygulî kerdbi. 

Mehkemeya Cezaya Girane ya Bedlîsî dewaya vera serebûtî de bi bahaneya ke 'hêrişkeran rê heqaret kerdo' cezaya zîndanî ya 2 mengan û 5 rojan daye Aygulî. 

Hetê bînî ra Aygulo ke hetê mehkeme ra erşawîyabi Dezgehê Tipê Edlîyî ci rê raporê 'rîyê ci de rêçê hêrişî nêmendo' dîya. Eke no rapor bêro esasgirewtene, cezaya hêrişkeran do bikêmîya.

Aygulî derheqê babete de qisey kerd û ard ziwan ke hêrişkeran ra verî ceza dîyaya ey û tepişîyayo. Aygulî vat: ''Seba ke mi menfaetê şarî pawit, seba ke ez nêmerda û mergî ra xelisîyaya mi erzenê zîndanî.''

Aygulî da zanayene ke hêrişê vera ci serebûtêko normal nêbi la rixmê ney zî derheqê hêrişkeran de çîyêk nêameyo kerdene.

Roniştişê dewaya vera hêrişkeran zî 25ê çeleyî de, saete 15.00 de Mehkemeya Cezaya Aslî ya Tetwanî de do bêro kerdene.