Hemvervatoxa DEM Partî Ayşegule Dogan eşkerayîya çapemenîye de rojdem erjna.

Ayşegule Dogan bale ante çalakîyanê protestoyî yê Îstanbulî ser û vat: ''Coka ma kuçeyan de yê, waran de yê, meydanaN de yê. Rîyê xeylê sebeban ra ma îtîrazanê xo kenê hempar. Ma semedê waştişanê xo seyyewbînîye, azadî û edaletî vengê xo berz kenê.''

Ayşegule Dogan vengdayîşê 27ê sibate yê Rayber Apoyî vistvîr û  nê vatî: ''Şayîyanê Newroze no firseto tarîxî dahîna hêzdar kerd. Ê ke vanê kurdî çi wazenê? Wa biewnê meydananê Newroze ra. Ê ke vanê muxatabê meseleya kurdî kam o? wa ê zî biewnê meydananê Newroze ra. Ewro waranê Newroze ra heta Saraçhaneyî her kes azadîye, demokrasî û seyyewbînîye wazeno. Gerek no waştişê demokrasîyî hol bêro goştarîkerdene. Bi qeyûman, destbendkerdiş û xespkerdişê îradeyî demokrasî nêbena. Coka nê rayîrî caverdê. 'Pêkerdişê bajarî' semedê demokrasîyê herêmî ame hazirkerdene. Wa 'pêkerdişê bajarî' nêro krîmînalîzekerdene. 'Pêkerdişê bajarî' semedê demokrasîyê herême gamêka qerardar a.''

Ayşegule Dogan semedê rayraşîyayîşê Amed- Amara ke do ambênê 1-4ê nîsane de bêro kerdene, ciwanî selam kerdî û nê vatî:'' Newroze de zaf eşkera vejîya werte ke çimê şarî Îmrali de yo.  Şar wayîrê vengdayîşê tarîxî vejîya. Rojnameger,dezgehê komelê sîvîlî û partîyê sîyasîyî wazenê Birêz Ocalanî reyde pêvînayîş bikerê. Cinî û ciwanî, keyeyê ci wazenê ey bivînê. Gerek kam ke wazeno, bieşko Birêz Ocalanî bivîno. Beno ke Heyetê Îmraliyî badê roşanî zîyaret bikero. Gerek hinî rayîrê Îmraliyî bêro akerdene.''