Vervatoxa DEM Partî Ayşegule Dogan Merkezê Partîya xo kombîyayîşê çapemenîye kerd û rojdem erjna. Qiseykerdişê Dogane ra qismêk wina yo:

''Ma vînenê ke no îqtîdar zî sey îqtîdaranê verênan qewimîyayîşan ra ders nêvejeno. Nê polîtîkayê ke yênê rayraberdene tim Tirkîya rê danê vînkerdene. Îqtîdar têna bi nê hêrişan peynîya xo keno nêzdî. Şima dişmenê kurdan ê. Ganî ma eşkera îfade bikerê. Her gama kurdan ra sûc îlan kenê û wina qeyde nîjadperestîye zî kenê normal. Operasyonêko newe dîya destpêkerdene. Xeylêk bajaran de cinîyî, ciwanî seba ke veyveyan de bi deyîranê kurdkî govende girewta, ameyî tepiştene.

Erdogan bi xo tim xo wasifeneno vano înan qedexeyê vera kurdkî wedarito û hînî kurdî eşkenê her ca de xo bi ziwanê xo îfadê bikerî. Eke wina yo, nê hêrişê vera kurdkî çî yê? Çîyo ke newe kewt mezuatê ma yê ceza: Kurdbîyayîş sûc o!  Kurd nêeşkeno ziwanê xo qisey bikero, govende bîgêro û bêro vîjnayene.

Mesela slogana “Bijî Serok Apo' sey sûcî hesibnenê. Na slogan yew heqîqat a ke her warê cuye de vejîyena verê şima. Xora goreyê qeraranê Mehkemeya Qanûnê Bingeyî, Mehkemeya Berze û Mehkemeya Heqanê Merdiman a Ewropa na slogane çarçewaya azadîye îfadeyî de yena erjnayene. Şima eşkenê na slogane qedexe bikerî la şima senî eşkenê rolê Birêz Ocalanî û raştîya ci qedexe bikerî? Şima senî eşkenê na heqîqetî werte ra waderê.

Xora têna gonvende nîya. Vera nuşteyan û tebelayanê trafîkî yê kurdkî zî hêriş est o.Çîyê winayên serranê 90yan de bîyî. Se bi? Pêrodayîşê îqtîdarê xo kurdan ser o mekerê. Şimo komelî kenê cîya. Nê polîtîkayan caverdê, kesê ke şima tepiştê vera bidê.  Ez tîya ra veng dana şaranê Tirkîya. Berê ma pêro pîya na govende gird bikerê.''