Însîyatîfê Çapemenîye yo Azad, Roja Azadîya Çapemenî ya Dinya pîroz kerde û bale ante serê rewşa 166 rojnamegeranê ke Tirkîye de zîndanan de yê. OGÎ da zanayene, rixmê zext û zordarîye zî ê çapemenîya azade ra tawîz nêdanê.
Însîyatîfê Çapemenîye yo Azad (OGÎ), bi wesîleya 3'ê Gulane Roja Azadîya Çapemenî ya Dinya eşkerayîyêka nuştekîye weşanaye.
Eşkerayîye de ame vatene, “Endeksê azadîye yê fikir û çapemenîye yê dinya de, mabênê 180 welatan de ma welatêko ke rêza 157 de yo de rojnamegerîye kenê.”
Însîyatîfî ard vîrî ke 166 rojnamegerî Tirkîya de zîndanan de yê û hukumwer ê û bale ante serê zext û zordarîya ke bi rojnamegeran û sazgehanê çapemenîye rê yenê kerdene.
Eşkerayîye de ame vatene, ê zanê ke rixmê şert û mercanê giranan xeylî rojnamegerî estê ke çapemenîya bêhete ra tawîz nêdanê. Ma bi na Çapemenîya Azade paştraşt ê. Bi nameyê Însîyatîfê Çapemenîye yo Azad, ma reyêka bîne danê zaneyene ke ma paştdayîş danê xebatkaranê çapemenîye yê ke renginîya, cîyayîya Tirkîya sey dewlemendîye vînenê û rayîrê demokratîkbîyayîşî roşn kenê. Bi nê ruh û ferasetî, ma 3'ê Gulane Roja Azadîya Çapemenî ya Dinya ya heme xebatkaranê medyaye pîroz kenê.”
Însîyatîfî raporê binpaykerdişê çapemenîye yê menga Çele, Sibate, Adare û Nîsane eşkera kerd. Goreyê raporî:
- 15 rojnamegerî ameyî destbendkerdene
- 8 rojnamegerî ameyî girewtene
- Derheqê 2 rojnamegeran de cipersayîşî ame akerdene
- Derheqê 7 rojnamegeran de dewa ameye akerdene
- 219 rojnamegerî ameyî muhakemekerdene
- 26 rojnamegeran rê cezaya pereyan û keyeyî ameye birnayene
- Rojnamegerêk ame teberkerdene.
