Meclîsê Ciwanan ê Partîya Çep a Keske ra Oguzhan Azbayî derheqê polîtîkayanê şerê taybetî yê dewleta tirke de ANFyî rê qisey kerd.

Azbayî da zanayene ke dewleta tirke qetî polîtîkayanê asîmîlasyon û qirkerdişî ra fek vera nêdayo û vat: ''Labelê bi taybetî wextê peyênî de polîtîkayê şerê taybetî giranêr kerdî. Her taxa Kurdîstanî de şuxilnayîşê madeya narkotîke zêdîyayo. Dewleta tirke wazena ke ciwanî bimusê kundoxî û serkêşîya komelî nêkerê, îtîrazî nêkerê û qisey zî nêkerê. Ewro domanê 11 serrî zî eşkenê xo biresnê kundoxî. 

Reyna Kurdîstan de kafe û parkan de fuhuş yeno kerdene. Ciwanan rê cuyêka dejenere yena ferzkerdene. Leşker, polîs û qoricîyî madeyanê narkotîkan roşenê, bazirganîya fuhuşî kenê, cinîyan rê tacîz û tecawuzî kenê. Kurdîstan de rewşe wina ya. Rewşêka winayêne de ganî têkoşîno şorişgêro kêm nêbo.''

Azbayî dîyar kerd ke polîtîkayê şerê taybetî tewr zaf vera ciwanan yenê kerdene la ganî nê sey meseleyêka ciwanan nêrê dîyene. Azbayî vat: ''Ganî ciwanî erk û mesuldarîyanê xo bikerê la ganî komel zî hişyar bibo. Ma her ca de bi keye, ciwan û cinîyan kom benê û xîret kenê ke komelî hişyar bikerê. Ma çarçewa kampanyaya 'Xoverdayîşê heybetînî yê vera şerê taybetî' de şayî, pîknîk û kargehan virazenê. Nê çalakîyan de ma metodanê têkoşînê vera şerê taybetî ercnenê.

Ganî ciwanî binê sîwana Meclîsê Ciwanan ê Partîya Çep a Keske de xo rêxistin bikerê. Bêkarî, ameyoxo nedîyar, bêhêvîtî û kaos seba ma ciwanan qeder nîyo. Ganî ma her ca de têkoşînî pîl bikerê. Bêrê ma waştişanê xo yê heqdaran ser bivisnê, seba ney têkoşînî ber bikerê.''