Hemserekê Pêroyî yê Partîya Demokrasîyî û Têtûştîye ya Şaran (DEM Part) Tuncer Bakirhan  badê Xoşkar û Kanîreşî merkezê Çewlîgî de şarî reyde ame têhet. Zafê înan ciwanî bi hezaran kesî tewrê têhetameyîşê şarî bîyî.

Tuncer Bakirhanî şaredarîya AKPyî rexne kerd û nê vatî: ''Zîhnîyetê înan ê şarederîye sey şarederayîya qeyûmî zîhnîyetê rantî yo. Şaredarîya qije ya Şaredarîya Çewlîgî bi se mîlyonan deyn kerdî. No pere sebi? Çîyêk nêameyo kerdene. Tirkîya de têna cayê ko şaredarî xizmetê resî nêkeno Çewlîg o. Her hetê Tirkîya de şaredarî xizmetê komresîye dano la Çewlîg de res, komresîye şexsan û fîrmayanê taybetan rê ameyo pêşkêşkerdene.''

Bakarihani vis vîrî ke Çewlîg serê xeta erdlerzî de yo û wina dewam kerd: ''Şaredarî vera nê tedbîr nêgirewtî. Herinda polîtîkayanê rantî de ganî tedbîrî bêrê girewtene. Çewlîg de tewr zaf kirdkî-zazakî yena qiseykerdene la bajar de qet yew tabeleya kirdkî çîn a û qet nameyê kuçeyêkî kirdkî nîyo. Çewlîg de bi seyan erjanê ma dinyaya xo bedilnaye. Nê serkêşanê kurdan ke semedê kurdan têkoşîn kerd qet nameyê înan ra yewî nêdîyayo yew kuçeyî la şaredar beg vano 'ez zaza ya' Eke ti zaza yî ganî ti cayê şarê xo de bî, nê meydan de bî. Kam ke tîya nîyo ne zaza yo ne zî xizmetê kurdan keno.''

Bakirhanî bale ante ser ke îqtîdar Anqara de ciya Kurdîstan de cîya polîtîkayan rayra beno û nê vatî: ''Ez pê bawer a ke şarê kurdî êyê ke Çewlîg de kurd, Anqara de îtîfaqê JITEM-Ergenekonî kenê, 31ê adare de cawabê înan do bido. Wazenê ke Çewlîgî bikerê bêkurd. La ê xeletîyenê. Şarê Çewlîgî tornê Seyîd Rizayan û Şêx Seîdan ê. Rixmê heme zilman, zextan herra xo canêverda, hêna do cemeverdo.

Şima semedê vatişê ‘Hinî bes o’ hazir ê? Ma herra Şêx Seîdî de yê. Şîriko qij ê AKPyî yaroje heqareto ke Şêx Seîdî rê nêkerd nêmend. Qey îqtîdarî çewî zî vengê xo nêvet? Çunke ê Şêx Seîdî sey erjêkî nêvînenî. Çewlîg de AKP û MHPyî îtîfaq kerd. Êyê ke ziwanê şima çîn hesibnenê vanê ke, Ey şarê kurdî rayanê xo bidê ma ke MHPyî ke Şêx Seîdî rê heqaret kerd, kurdan rê heqaret keno wa bibo şîrikê şaredarî. Şima vera nê nêvejîyenê?

Cografyaya Kurdîstanî de zaf ciwanî xo kişenê. Qey?  Çew keyfî ra xo nêkişeno. Ya feqîr o, ya bêkar o, ya nêeşkeno îdareyê xo bikero ya zî binê problemanê xo de maneno.  Sebebê nê xokiştişan hemwelatî nê no sîstem o. Ma do pêro pîya vajê nê.''