Hemserekê Pêroyî yê Partîya Demokrasîyî û Têtûştîye ya Şaran (DEM Part) Tuncer Bakirhan badê Xoşkarî qezaya Kanîreşî ya Çewlîgî de şarî reyde ame têhet.  Bakirhan dekewtişê qeza de bi konvoyan ame pêşwazîkerdene.

Wekîlê DEM Partî Sahîha Aydeniz û Omer Faruk Hulaku û namzedê Şaredarîya Çewlîgî Aydin Burçun û Çeçek Ariş û namzedê Şaredarîya Kanîreşî Zuhre Eroglu û Mehmet Genç zî tewrê têhetameyîşê şarî bîyî.

Şarî bi tîlîlîyan govende girewte û warê kombîyayîşî ra slogana “Jin, jiyan, azadî”  bîye berze. Dayîkanê Haştîye vernî de cayê xo girewt. Bi coşê ciwanan û renganê kesk sor û zerdan şayîya rengine ameye kerdene.

Badê qiseykerdişê nazedanê Kanîreşî Bakirhanî qisey kerd. Bakirhanî bi yadkerdişê Hamdullah Ogenî dest pê qiseykeridşê xo kerd  ke weçînayîşanê 2015 de amebi qetilkerdene,

Bakirhanî nê vatî: ''Kanîreş de nêweşxane est o la hacet çîn ê. Nêweşî gama ke şinê Erzirom ya zî Çewlîg dinyaya xo bedilnenê. Qezaya winayêne de senî doktoro pîspor çîn o? Çar hetan de dere est o la şar keyeyê xo awa pake nêşimeno. Ma Kanîreşî ra veng danê Erdoganî; Kanîreş û Çewlîg destê AKP de yê, temam keso ke raya xo to nêdano, ti xizmet nêdanê ci la înanê ke raya xo daya zî tI xizmet nêdanî.

Cayo ke kurdî tede yê zilm est o, barkerdiş est o. Embazê ma yê ke kar nêvînenî şinê metropolan. Nêweşîya silîkozizî genê. Têna Kanîreş de 28 embazanê ma na nêweşî ra dinyaya xo bedilnaye. Sebebê nê îqtîdarê AKP-MHPyî yo.  Şarê ma welatê xo de kar nêvîneno. Wazenê ke tîya kurdan ra veng bikerê. Ganî no îqtîdar bibedilîyo ke şar bajarê xo kar bikero. Rîyê îqtîdarê AKPyî ra şar bêkar o. Wa Bilal Erdogan bi 10 hezar îdareyê xo bikero ma bivînê. Hinî şarî de hal nêmend, bêteqat o.

Şima ke hezar serrî yo na herre de ciwîyenê, ziwanê şima çîn hesibîyeno.  Şaredarîyanê kurdan de qeyûm ca kerdî. Nê dişmenê kurdan ê. Coka nê vîjnayîşî wesîleyêk a.  DEM Partî ameyoxa şarê kurdî ya, ziwanê  ci ya. Çewlîg bajarê erdlerzî yo la hema zî semedê ci tedbîrî nêameyî girewtene.  Ma do cewabê nê 31ê adare de bidê. Ma do Kanîreşî reyna biresnê îdareyê demokratîkî. Ma de xayînîye, dizdîye çîn a. Serekê Şaredarî ho ça? Kurdî ziwanê kurdan xeymê ey de nîyê, têna menfeatê xo dima yo. Selahattin Demirtaş, Gultane Kişanakî seba ke şima ziwanê xo qisey bikerî zîndan de yê.  Kanîreş do 31ê adare de mijdana girde bido Demîrtaşan û Kişanakan.

Erdogan vano  ke wa 'Kitabo sor bêro aktuelkerdene.' Kitabo sor Qanûnê Bingeyî yê Tikrîya yo nimite yo. No kitab vano wa kurdî ziwanê xo qisey mekerê, xizmet mevînê, bêrê asîmîlekerdene, cografyaya Kurdîstanî bêro bêkurdkerdene.  No wehşet qîm nêkeno, wazenê qoqê ma bikenenê. Nê dirî yê. Şima torne Şêx Seîdî ziwanê xo caverdenê? O wext înan 31ê  adare de bifînê zereyê sindoqe. Tirkîya hewceyê kitabanê sûran nê, hewceyê kitabanê haştîye ya. Ez veng dana Erdoganî; Ma Tirkîya de kitabê haştîye pîya binusê.''

Badê qiseykerdişê Bakirhanî têhetameyîş bi girewtişê gonvendan qedîya.