Hemserekê Pêroyî yê DEM Partî Tuncer Bakrihanî kongreya partîya xo ya Dêrsimî de qisey kerd. Qiseykerdişê Bakirhanî ra qismêk wina yo:

Ez şarê Dêrsimî selam kena ke ey Sakîne Cansiz, Aysele Dogan pabesteyê qoqanê xo yo, vizêrî heta ewro têkoşîno birumet kerd, mojna ma ke têkoşîn senî erjîyaye yo. Ez kêfweşa ke mekanê Duzgun Baba, Munzur Baba û Ana Fatma de ya.

Ma şexsê Nurhayate Altun de hemrayanê xo yê ke zîndan de yê selam kenê. Şexsê Songule Erola ke surgun de şorişgêrê ke surgun de înan rê selamanê xo şawenê. Dêrsim tim rixmê heme hêrişan bi hewayêkê qerardarî têkoşînê xo domeno.

Sîstemo kapîtalîst bi şer û gonî xo weye keno. Çi heyf ke ewro Rojhelatê Mîyanênî û Kurdîstan şer est o. Ganî ma vera  nê şeran her wextî ra zafêr têkoşîn bikerê. Ewro Rojhelatê Mîyanênî bîyo gola gonî û mabênê Îsraîl û Fîlîstîn de şer est o. Erdogano ke semedê Fîlîstînî hesranê tîmsahî rişneno, şarê Rojawanî ser o bombayî varnayî.

Sîtem zaf şino Dêrsimî ser. Cografyaya Kurdîstanî û elewîyî cîya yenê vînayene la Dêrsim înan ra zî wetêr cîya yeno vînayene. Çunke Dêrsim çirey milê xo çewt nêkerd. Nê semedî ra sîstem zafêr bi polîtîkaya faşîzan nêzdîye Dêrsimî bena. Ganî ma nê demî de nê polîtîkayanê sîstemî Dêrsimî ra bierzê teber. Sîstem nîka têna bi qirkerdişê fîzîkî hêriş nêkeno. Her hetî ra hêrişê Dêrsimî keno. Ma vînenê ke qeyûman Dêrsimîn ard çi hal. Şarê Dêrsimî do newera bi ferasetê îdareyanê cayîyan ê demokratîkan bêro têhet. Dêrsim hewceyê nê yo. Semedê wayîrvejîyayîşê nasname, xoze û ziwanê heceyê nê yo.

Hukmatê semedê Dêrsimî vano 'bajarê hûzûrî'. Her hetê Dêrsimî kalekol û kamera yê. Bajar de xokiştişê ciwanan qewimîyenî. No senî bajarê hûzûrî yo. Hende kalekol û kamerayî est ê, ez wazena bipersî Gulîstne Doku ha ça? Îqtîdar Dêrsim û têkoşînê dêrsimijan ra terseno.

Ma tîya eşnawit ke Dêrdim de hinda bi destê sîtemî ciwanî vejîyenê teberê welatî ke wa bajar bêro vengkerdene. Kenê ke Dêrismî erjanê ci ra raqilnê. La têkoşînê ke bi Seyîd Rizayan dest pêkerd, bi Mazlûman û Îboyan dewam kerd û ewro zî bi Mazlûmanê hemdeman û Îboyan dewam keno, ganî ewro ra tepîya zî dewam bikero. Seba ke polîtîkayê sîstemî bero betalkerdene, wa ciwanê ma wayîrê xoza, bajar û têkoşînê xo bivejîyê.

Verê ma de vîjnayîşo cayî est o. Ma newe kongre ra vejîyayî.  Vanê qey bi qefilnayîşê partîyan verê ma genê. Nameyê partîyan ma rê ferq nêkeno. Ma zî sey şarê Dêrsimî rike û qerardar ê. Ewro kongreya DEM Partî ya Dêrsimî de zî yeno vînayene ke ma senî hêzdar ê. Ma do narey Dêrsim de netîceya tewr pîle bîgêrê.

Ma her wextî ra zafêr vanê heqanê elewîyan wazenê, wa cemxaneyî bibê wayîrê statuyê îbadetxaneyan. Ziwanê dayîkê yê kurdan wazenê, wayîrê şorişgêran vejîyanê. Ma paştî danê embazanê xo ke grevê vêşanîye de yê. Ma vanê wa tecrîdê serê Birêz Ocalanî bêro wedaritene ke meseleya kurdan bêro çareserkerdene. Ma vanê Kurdîstan, Dêrsim, bindestî, kedkarî. Ma bîyî grûba bindestena, feqîran, bêhêvîyan, kesê ke wazenê kultur û ziwanê xo biciwîyê. Bi paştdayîşê şima do parlemento de têkoşînê ma bêro xurtkerdene. Qezenckerdişê Dêrsimî wayîrvejîyayîşê Seyîd Riza û embazanê ci yo.''

Kongre de Ozcan Gurtaş û Esma Ataş sey hemseranê neweyan ê DEM Partî yê Dêrsimî ameyî vîjnayene.