Hemserekê Pêroyî yê DEM Partî Tuncer Bakirhanî ard ziwan ke Rayber Apo do seba çareserîya meseleya kurdan û demokratîkbîyayîşê Tirkîya vengdayîşêkê tarîxî bikero û vat: ‘’Îqtîdar seba gameştişî pabeyê çita yo?’’
Hemserekê Pêroyî yê DEM Partî Tuncer Bakirhanî Meclîs de kombîyayîşê hewteyînî de qisey kerd.
Tuncer Bakirhanî bale ante hêrişanê vera çapemenîya azade ser û vat: ‘’Her roje xebatkarê Yeni Yaşamî, JINNEWS û Ajansê Mezopotamya tepişîyenê. Ma nê tedayan lanet kenê. Ma tim hetê rojnamegeran de yê.’’
Bakirhanî vera destsernayîşê Şaredarîya Sêrtî nêrazîbîyayîşê xo mojna û vat: ‘’Îradeyê şarê Sêrtî çin hesibîyeno. Hemşaredaranê ma seba şarê xo xizmet kerdêne. Ez venga pêro komelî dana ke vera ferasetê qeyûman tewirê xo bimojnoç Ma venga îqtîdarî danê ke ferasetê ‘kurdî est ê la îradeyê înan o sîyasî çin o’ ra fek vera bido.’’
Bakirhanî pare kerd ke çareserîya haştîyane û demokratîke ya meseleya kurdan do serkêşîya krîteranê demokratîkan bikera û vat: ‘’Haştîye yena manaya awankerdişê edaletêkê komelkî. Haştîye bi caardişê waştişanê kurdan bena.
Binê şantaj, gef û tedayan de haştîye nêbena. Haştîye binê roşnîya azadî û demokrasîyî de awan bena. Wext wextê bêvengbîyayîşî nîyo. Ma pabeyê çita yê?
Ez wazena raşta raşte îqtîdarî ra pers bikera; hukmat çira babeta demokrasî û serwerîya huqûqî de game nêerzeno, pabeyê çita yo? Nê babetanê bingeyînan de wa îqtîdar game bierzo. Çita ho îqtîdar vindarneno? Ganî nê persî bipersîyê.
Birêz Abdullah Ocalan do wextê verê ma de vengdayîşêkê tarîxîyî bikero. Ez babeta ke işima û rayaumûmîye tewr zaf meraq kenê, vaja. Birêz Ocalan amadekarîyan keno ke seba çareserîya mende ya meseleya kurdan û seba awankerdişê Tirkîyayêka demokratîke vengdayîşêkê tarîxî bikero.’’
Kombîyayîşî ra dima rojnamegeran pers kerd ke Rayber Apo do key vengdayîşê xo bikero.
Persî ser o Bakirhanî vat: ‘’Beno ke 15ê sibate de, beno ke dima do bikero.’’
