Hemserekê Pêroyî yê DEM Partî Tuncer Bakirhanî kombîyayîşê koma meclîsî yê partîya xo de qisey kerd.

Qiseykerdişê Bakirhanî ra tay noqtayê girîngî wina yê:

''Eqlê neteweperestîye û nîjadperestîye berz beno. Nê welatî de kam namerdîye, xayînîye û neheqîye bikero xo peyê neteweperestîya xo de nimneno. Nê wextanê peyênan de vera partîya ma qiseyê dişmenî yenê kerddene. Şarê kurdî, DEM Partî û partîyê kurdan ê bînî vera emperyalîzm û kolonyalîzmî yê û do tim têkoşînê xo rê dewam bikerê. Ma roja verêne ra nata bi israrî vanê ke meseleya kurdan meseleya bingeyîn a ke ganî bêra çareserkerdene.

Ma venga şaranê Tirkîya danê ke vera pêlê neteweperestî û nîjadperestîye ma eşkenê haştî û demokrasî xurtêr bikerê. Ma venga eqlê dewlete danê ke seba xelisîyayîşê Tirkîya rayîro verên û tek haştîya komelkî ya. Wa dewlete seba haştî û çareserîye game bierza. Ganî dewlete hol bizana ke her ke berê Îmraliyî amebi akerdene hêvîya çareserîya demokratîke pîlêr bîye, ekonomî weşêr bîye. Birêz Ocalan bi serran o seba çareserîya meseleya kurdan israr keno. Goş bidê Birêz Ocalanî. Tede ronişê û qisey bikerê. ''