Weçînitişê 14ê gulane beno nêzdî. Teberê welatî de rayedayîşî dest pêkerd. Swîre de xebatê Partîya Çep a Keske bicoş dewam kenê. Ewro Swîsre de raydayîşî dest pêkerd.

Koordînasyonê Weçînitişî yê Partîya Çep a Keske yê Swîre vizêr Basel de mîtîngêk organîze kerd. Rixmê varayîşî şarî govende girewte û warê mîtîngî canêverda.

Mîtîng pê rêzgirewtişî dest pêkerd û qiseykerdişo verên Wekîla HDPyî ya verêne Besîme Konca kerd. Konca bale ante muhîmîya weçînitişî ser û veng da ke wa her kes raya xo bişuxulno. Konca vat: “Ma weçînitişê pêroyî de 6 mîlyon û nêm rayî girewtî. Eke her kes yew kesî îkna bikero û raye bido Partîya Çep a Keske ma eşkenê 10 mîlyonan ra zafêr rayan bîgêrê. No hêzê ma est o.”

Serekê Kantonê Baselî Bulent Pekerman zî vat: “Tirkîya de gerek tay çîyî bibedilîyê. Semedê bedilnayîşî gerek ma pêro rayanê xo bidê Partîya Çepa Keske.”

Wekîlanê  Swîsre Edîbe Golgelî, Sibele Arslan û Mustafa Atici zî qiseykerdişanê xo de bale ante rewşa xirabe ya Tirkîya ser û vat seba ke welat tarîtîye ra bêro xelisnayene gerek her kes rayanê xo bido Partîya Çep a Keske.

Temsîlkarê HDPyî yê Ewropa Faysal Sariyildiz zî veng da ke wa şarê Swîsre wayîrê Partîya Çep a Keske bivejîyo. Reyna bi nameyê Komeleya Elewîyan a Weilî, ÎGÎF, SYKP zî qiseykerdişî ameyî kerdene.

Badê qiseykerdişan bi deyîranê hunermendanê MED-DERî binê şilî de govende ameye girewtene.