Xebatê weçînayîşî yê 14ê gulane yê Tirkîya Ewropa de dewam kenê. Îtîfaqê Kede û Azadîye armanc keno ke teberê welatî de se ra 50ê rayan bigêro.

Koordînasyonê Weçînayîşî yê Partîya Çep a Keske yê Baselî zî amadekarîyê xo qedînayî û amade yo ke 29ê nîsane de weçinîtoxan bero cayanê raydayîşî. Koordînasyonî ra tay kesan derheqê xebatan de ANFyî rê qisey kerd.

Endamê Koordînasyonê Weçînayîşî yê Baselî  Mehmet Karahanî vat: ''Amadekarîyê ma, muşahîdê ma temam ê. Raydayîş 29ê nîsane de do dest pêbikero û 7ê gulane de biqedo. Ma otobusî amade kerdî. Ma do weçînitoxan berê cayê raydayîşî. Ma do 4 herêman de otobusan weriznê we û berê Zurichî. Ma kenê ke Swîsre de partîya ma ser bikewa.''

Endamê Koordînasyonî Seyît Manîşî vat: ''Ma xo resa bi hezaran weçîntoxan û seba qeydkerdişî hetkarîya înan kerde. Basel de seba serkewtişî tecrubeyê ma est ê. Seba ke no sîstem bêro rijnayene û seba ameyoxê şaran ma pêro hêzê xo seferber kenê.'' 

Sakîne Tosuna ke bi aktîfî tewra xebatan bena vat: ''Ez şarê ma ra wazena ke wa raya xo bida partîya xo. Wa zulm biqedo. Seba merdimanê xo, seba şarê xo ma raya xo  bidê partîya xo ke nê felaketî biqedê.''

Abdûlselam Sakikî vat: ''Wa her kes raya xo bido, çew xo ney ra apey nêgêreno. Nê weçînayîşî seba kurdan zaf girîng ê. Eke ma nê weçînayîşan de bin bikewê hînî do çin bibê. Wa çew nêvajo ke karê ci est o, nêşino raydayîşî. ''

Mîne Nazarîya ke Mayanê Şemeyî ra ya û surgunê Baselî bîya vat: ''Ma her roje broşurê Partîya Çep a Keske vila kerdî. Ma seba serkewtişî bi kelecanî yê. Ma seba Partîya Çep a Keske xebitîyenê.''

Mûstafa Demîrî vat: ''Ma dawetan, kargehan û qewexaneyan ra gêrayî. Her kesî zaf eleqe mojna ma. Teyna Basel de ney ma her ca de kenê ke xo biresnê ke weçînitoxan. Seba qedînayîşê nê rejîmî her raye zaf girîng a. Coka ma weçînitoxan benê heta cayê raydayîşî.''