Endamê Komîteya Bawerîyan û Şaran a PKKyî Cîhan Erenî derheqê raştîya îtîfaqê AKP-MHP-Huda Par-PDKyî û hêrişanê vera elewîyan de ANFyî rê qisey kerd.

Qiseykerdişê Cîhan Erenî ra tay noqtayê girîngî wina yê:

''Dewleta tirke bi taybetî Darbeya 1980î û xîretê Darbeya 15ê Temmuza 2015î ra dima hîna zaf sloganê îtîhatî tesdîq kerdî. Weçînayîşanê peyênan de îqtîdar vera xeta Kemalîstan ser kewt. Dewleta tirke nika destê dînperest û nîjadperestan de ya. Îqtîdar seba ke qirkerdişê kurdan temam bikera propagandaya nîjadperestîye û dînî keno û xîret keno ke şar zî destek bido ci. Tecrîdê vera Rayber Apoyî zî parçeyêkê qirkerdişê kurdan o. 

Osmanîyan ra nata eqlê tirkan kerd ke kurdan pê Îslamî bixapîno. Wexto ke Komara Tirkîya ronîyaya dewleta tirke seba ke verê neteweperwerîya kurdan bigêra tekke û medreseyî qefilnayî la kurdê hemkarî weye kerdî. Mîsal dewleta tirke Şêx Seîd û embazê ci darde kerdî la şêxê hemkarî pabesteyê xo kerdî. Dewlete bi destê nînan propaganda kerd. 

Weçînayîşanê peyênan de Hîzbullaho ke Ergenekonî rêxistin kerdo, îlaweyê hemkaran ame kerdene.  Huda-Paro ke Hîzbullah o, hetê îqtîdarî ra vera kurdan şuxilîyeno. Îqtîdar keno ke pê destê Huda-Parî kurdanê dîndaran îstîsmar bikero. Dewleta tirke Hîzbullah Vakur de sey kontragerîlayan şuxilnabi. Nika zî îqtîdarê AKP-MHPyî Huda-Parî Meclîs de vera têkoşînê kurdan şuxilneno.AKP-MHP keno ke çimanê kurdan de Huda-Parî sey 'komelê dîndarî yê holî' bimojno. AKP-MHP Huda-Parî do hêrişanê vera cinîyan, têgêrayîşê azadîye bişuxilno. 

Başûr û Rojawan de zî dewleta tirke heman sîyasetî ana ca. Başûr de Hîzbullah pê destekê PDKyî beno pîl. Hîzbullah Başûr de şarê kurdî îstîsmar keno. Hîzbullah Başûr de keno ke hêrişanê vera Herêmanê Pawitişî yê Medya meşrû bikero, sempatîya şarî ya seba gerîlayan çin bikero û verê tewrbîyayîşan bigêro. Dewleta tirke kena ke pê destekê PDKyî destkewteyanê şarê Başûrî çin bikera. AKP-MHP Başûr de pê PDKyî se keno, Vakur de zî pê Huda-Parî heman çî keno

Hîzbullahî zaf alîmê kurdî yê welatperwerî qetil kerdbî. Nika Huda-Par zî heman çi wazeno. Ganî şarê ma na babete de bêro hişyarkerdene. Îtîfaqê AKP-MHP-Huda-Parî teyna kurdan rê ney tirkan rê zî zerar dano. Ganî seydayê kurdî vera Huda Par-Hîzbullahî û hemkaranê înan hişyar bê û şarî zî hişyar bikerê. Dewleta tirke pê destê Huda-Parî kena ke mîyanê komelî de dişmenîya vera PKKyî awan bikerê. Alîmê ma yê welatperwerî wa verê ney bigêrê. 

AKP-MHP keno ke elewîtîye çin bikero. Erdogan pê kerdişanê xo yê Cemxaneyî mojneno ke o senî elewîyan asîmîle keno. CHPyî xora elewîyan de çîyêk nêverda û xo zî qedîna. Dewleta tirke kena ke elewîyanê xo biaferna. 

Dewleta tirke wexto ke babete bena kurd û elewîye bena dişmena hare. Wa elewîyî xo nêzdîyê dewlete nêkerê. Na dewlete dewletêka kanwaz a. Îqtîdarê AKP-MHP-Huda Parî keno ke elewîyan asîmîle bikero û nînan binê Îslamî de pêser bikero. 

Ganî dezgeh, komel û rêxistinê elewîyan vera hêrişanê dewlete û îqtîdarî yew bibê, wayîrê nasnameyê xo vejîyê. Elewîyê kurdî cemanê xo bii kurdkî bikerê, cinîyan bawerîye ra dûrî mevisnê, wayîrê zîyaretgehan, xoza û ocaxanê xo vejîyê. ''