Sîyasetmedarê kurdî Osman Baydemîrî bi rayîrê ajansê ma venga pêro şarê Amed û Riha da ke weçînayîşanê 14ê gulane de raya xo bido Partîya Çep a Keske. 

Baydemîrî mesajê xo de wina vat: 

''Amed kelaya têdûştî ya û tim paştî daya ewladanê xo. Narey zî wa Amed paştî bido ewladanê xo. Way û birayê min ê ercîyayeyî; ê wazenê ke kurdayetîye werte ra wedarnê, qeyûman bişawê. La ma do 14ê gulane de sindoqan de cewabê tewr pîlî bidê înan û ma bimojnê ke kurdan qetî ziwan, welatperwerî, nasname û tewirê xo ra fek vera nêdayo. Mor û kilîd destê şima de yê. Ez pê bawer a ke Amed 14ê gulane de rolê xo yê tarîxîyî bîyaro ca. 

Way û birayê min ê rihayîjî; Riha mi rê cayê perwerîye yo. 2014 de Riha berê xo mi rê akerd. 2015 de Riha vat ke a do qetî Îbrahîmîyan rê berê xo nêqefilna.  14ê gulane de ganî Riha cewab bida Nemrutan. Ganî serê sindoqan de şarê Riha AKP-MHP-Ergenekonî ra hesab biperso. Ma şorê sindoqan ser û raya xo bidê Partîya Çep a Keske. Ma do dewranê Îbrahîmîyan bidê destpêkerdene.''