Hemserekê Konseya Rayberdişî ya KCKyî Cemîl Bayikî ANFyî rê qisey kerd û rojdem ercna. 

Qiseykerdişê Bayikî ra tay noqtayê girîngî wina yê:

''Ma wextêkê dergî ra nata Rayber Apoyî ra xeberêke zî nêgênê. Tecrîdo mutlaq hînî şarê ma qerqilneno. Kurdî dinya de şorê kamca wa felsefe û fikranê Rayber Apoyî zî tede berê. Rayber Apo serekê merdimatîye yo zî. Xora ma Konferansê Hamburgî de dî ke fikrê Rayber Apoyî rixmê astengkerdişan zî resenê pêro dinya. Ganî ma şorê kamca paradîgmaya Rayber Apoyî zî berê û têkoşînê seba azadîya ey her ca de bikerê rojdem. Ewro CPT û Konseya Ewropa benê hemkarê polîtîkayanê tecrîdî yê dewleta tirke. Ganî şarê ma ney teşhîr bikero. Wa her kes vera tecrîdî têkoşînî berzêr bikero. 

18ê Gulane Roja Şehîdan a û gulane zî Menga Şehîdan a. Bi na wesîle ez pêro şehîdanê ma bi rêz û minetî yad kena. Partîya ma partîya şehîdan a û ma xeta şehîdan de têkoşîn kenê. Têgêrayîşê ma heta nika bi hezaran şehîdî dayî. Şehîdan rê sozê ma yo ke welatî azad û demokratîk bikerê. 

Ganî Partîya Çep a Keske bi xurtî bikewa Meclîsî. Nika seba ke sosyalîstî, welatperwerî, têkoşer û demokratî welatî bivurnê verê înan de firsendêko tarîxî est o ke no zî weçînayîşê 14ê gulane yê. Seba ke no firsendo tarîxî hol bêro şuxilnayene ganî Partîya Çep a Keske xo hol rêxistin bikera û bi xurtî bikewa Meclîsî. Eke Partîya Çep a Keske bikewa Meclîsî do bieşka meseleyanê şaran çareser bikera. 

Erdlerzê 6ê Sibate de îqtîdarê AKP-MHPyî şar terikna, teyna verda. Ma o çax sey têgêrayîşêkê exlaqîyî bire daye ke çalakîyanê gerîlayan wextêk vindarnê. Dima rojdemê weçînayîşî dest pêkerd. Îqtîdarê AKP-MHPyî waşt ke pê provakasyonan nê prosesî rê tesîr bikero. Coka seba ke ma verê nê provakasyonan bigêrê bire daye ke bira çalakînêkerdişî heta weçînayîşan derg bikerê. Ma bi na bire fedakarîyêka pîle kerde. La dewleta tirke bi destekê NATO û Yewîya Ewropa hêrişanê xo rê her ca de dewam kerd. Ma reyna mesuldarîya xo anê ca. La dewleta tirke pê destekê nê hêzan sey domanêka kawbîyaye têgêrena çunke çew ci rê vengê xo nêkeno. 

Îqtîdarê AKP-MHPyî seba ke estbîyayîşê xo rê dewam bikero komelî keno parçe. No îqtîdar kam vera ci vengê xo bikero ey pê 'terorîzmî, hetkarî û hemkarîya PKKyî' sûcdar keno. Nika nê prosesê weçînayîşan de îqtîdar pê tepiştiş û krîmînalîzekerdişê kurdan keno ke payan ser de bimano. AKP-MHP Partîya Çep a Keske-Îtîfaqê Kede û Azadîye verê xo de sey astengîye vîneno û keno ke verê nînan bigêro. No hewte çend reyî îqtîdarî pê operasyonanê destbendkerdişî waşt ke mudaxeleyê prosesê weçînayîşî bikero. Ez venga her kesî dana ke sindoqan de cewabê nê hêrişan bido û ferasetê îqtîdar bin bivisno. Nê operasyonî armanc kenê ke vengê şarî bibirmê. Coka wa çew apey gamêke nêerzo. Wa her kes têkoşînî pîlêr bikero û bi qerardarî û çêrî têbigêro.

Îqtîdarê AKP-MHPyî dişmenê kurdan, cinîyan, ciwanan, elewîyan û pêro beşanê komelî yo. Îqtîdar keno ke pê polîtîkayanê şerê taybetî ciwanan bêtesîr bikero. La ciwanî ganî tewirê xo yê Newroze nê prosesê weçînayîşan de bimojnê. AKP-MHPyî şar ardo verê vêşanîye, şar muhtacê sereyêkê pîyazî kerdo. Ma eşkenê vajê ke tewr verêne cinîyan vera AKP-MHPyî dest pê têkoşînî kerd. Naye ra no îqtîdar hende dişmenîya cinîyan keno. La yew îqtîdaro ke cinîyî paştî nêdanê ci mehkumê rijîyayîşî yo. 

Hînî ganî Partîya Çep a Keske û Îtîfaqê Kede û Azadîye keye bi keyeyî bigêrê, xo rêxistin bikerê û bi xurtî bikewê Meclîsî. Nê weçînayîşî do qederê kurd, elewî, cinî, kedkar û ciwanan dîyar bikerê. Nê weçînayîşan de ya Tirkîya do biba demokratîke yan zî faşîzm do bibo mende. Ganî elewî, kurd, sosyalîst, demokrat, cinî û ciwanî nê weçînayîşan de ser bikewê. Ganî nê esasî ser o her kes bi xurtî bixebito. Hînî wextê dewrê AKP-MHPyî qedîyayo. Erkê ma yo ke ma nê îqtîdarî bin bivisnê. Coka ez venga pêro cinîyan, kurdan, elewîyan, ciwanan, kedkaran, Partîya Çep a Keske, Îtîfaqê Kede û Azadîye û pêro kesanê ke vera faşîzmî yê, dana ke nê firsendê tarîxîyî hol bişuxilnê.''