Hemserekê Konseya Rayberdişî ya KCKyî Cemil Bayikî bi wesîleya serrgêra Komployê Mîyanneteweyîyî yê vera Rayberê Şarê Kurdî Abdullah Ocalanî yo ke 9ê teşrîna verên a 1998î de dest pêkerd, ANFyî rê erjnayîşî kerdî. Beşê hîrêyinî yê roportajî de Cemil Bayikî qala merheleya dîyine ya hemleya '2Abdullah Ocalanî rê azad, meseleya kurdan rê çareserîya sîyasîye'' de qisey kerd. Roportajî ra qismêk wina yo:

Semedê azadîya fîzîkeye ya Rayber Apoyî 10ê  teşrîna verêne a 2023yî de hetê enternasyonalîstan ra hemleya 'Abdullah Ocalanî rê azad, meseleya kurdan rê çareserîya sîyasîye' dîyaye destpêkerdene. Şarê kurdî zî na hemle de ca girewt. Serkêşîya hemle kurdan nê, şarê ke demokrasî, azadîye, edalet û seyyewbînîye wazenê, kerd. Na hemle rojdemêk afirna, paradîgmaya Rayber Apoyî da naskerdene û heme dinya ra vila kerd. Coka merheleya verêne bi serkewtişî ameye temamkerdene. Hemle serêkê xo dima verdaye. Ez reyna her kesî selam kena ke na hemle de ca girewt. Hemle de xelêk averşîyayîşî û serkewtişî ameyî caardene ke nînan de rolê enternasyolîstan gird o. Her roje fîkrê Rayber Apoyî resenê zafêr kesan.

Xebatê semedê hemleya azadîye û çareserîye bimbarek ê la semedê azadîya Rayber Apoyî qîm nêkenê. Ganî têgêrayîşêko xurtêr bêro averberdene.  Nê semedî ra ganî her kes çîyo ke destê ci ra yeno bikero. Ganî rojdemê her kesî no bo û nê esasî de xebatan bikero. Mîyanê pêro xebetan de xebera merkezî Rayber Apo yo. Ganî ma lezabez têgêrayîşêkê xurtî aver berê. No wezîfeyê her kesî yo. Têgêrayîşêko ke mîlyonî tewrê ci benê ganî bêro averberdene. Ganî bi mîlyonan tewrê mîtîngan bibê, mîlyonî rayra şirê. O wext Rayber Apo beno azad.

Eke azadîye fîzîkîye ya Rayber Apoyî bêra caardene meseleya kurdan zî yena çareserkerdene. Coka şar vano 'Rayber Apoyî nizdîbîyayîş ma rê nizdîbîyayîş o.' Ganî her kes bitaybetî sey endam hewarîyanê nê têgêrayîşî yanî yê  têgêrayîşê PKK-PAJKî pawitişanê Rayber Apoyî vila bikero, biresno her cayî. Ganî serê pawitişan ra muneqeşeyî bêrê kerdene. Eke nê bikerî paradîgmaya Rayber Apoyî dahîna hol yena famkerdene. Na çarçewe de ez her kesî rê serkewtiş wazena. Ez Komployê Mîyanneteweyîyî reyna şermezar kena. Ganî hêrsê ma yê vera komployî dahîna gird bo û biaçarîyo rêxisitinîye û çalakîye. Bijî Rêber Apo.''