Bajaranê Kurdîstanî de semedê azadîya Rayberê Şarê Kurdî Abdullah Ocalanî û çareserîya meseleya kurdan Rayrşîyayîşê Azadîye yo Pîl dîya destpêkerdene. Rayraşîyayîşo ke Wan û Qers de dîya destpêkerdene, 15 sibate de do biqedîyo. Wekîla DEM Partî ya Mêrdînî Bêrîtane Guneşa ke mîyanê rayraşîyayîşî de ca gena, rayraşîyayîş erjna.

Bêrîtanê Guneş bale ante tecrîdê giranî yê Îmraliyî ser û nê vatî: ''Ewro sîyasetê Tirkîya Kurdîstan û Rojhelatê Mîyanênî bi tecrîdî yeno bewlîkerdene. Herçî pabesteyê tecrîdî yo. Heme problemî giradeyeyê tecrîd û meseleya kurdan ê. Heme gamî goreyê nê yenê eştene. Problemê tecrîdî prbolemêko gird o û îqtîdar bi tecrîdî problemanê bînan zî giran keno.

Îqtîdar keno ke bi tecrîdî têkoşînê şarê kurdî yo ke bi serran o yeno domnayene, ziwan, sîyaset, kultur û paradîgmaya ci betal bikero. Bi tecrîdî keno Birêz Ocalanî şarî ra raqilno. Îqtîdar keno ke bi tecrîdî komelî haştîye û çareserî ra raqilno. 25 serrî yo tecrîd rojdemê kurdan de yo û rixmê heme cehdkerdişê îqtîdarî, zextan û hêrişan Îmrali nêame vîraşîyayene. Ma bi nêrayraşîyayîşî reyna tecrîdî fînenî rojemê îqtîdar û komelî.

Tecrîd tesîrê pêro komelî keno. Şexsê Îmraliyî de heme Rojhelatê Mîyanênî binê tecrîdî de yo. Ma Wan û Qersî ra rayraşîyayîşê xo da destpêkerdene. Ma Wanî ra 37 kesî tewrê rayraşîyayîşî bîyî la semedê paştîdayîşî bi desan kesî tewrê ma bîyî. Ma bi bawerîya pîle ameyî têhet. Verê rayraşîyayîşî polîsan dormeyê ma girewt waşt verê ma bîgêrê. Nêwazenê wa vegnê zîndanan bêro eşnawitene.

Ewro kuçeyan de caardişê tecrîdî dewam kerd. Ma ewro reyna dî ke tecrîd têna Îmrali de nîyo, her kuçeyê Kurdîsanî de her kesî ser o est o. Tecrîd her ca de yo, zereyê keyeyê ma de zî est o. 68 rojî yo ke zîndanan de xoverdayîşê tepişteyan est o. Ewropa de çalakîyî yenê kerdene. Vera tecrîdî şarî têkoşîn kenê. Nê çalakîyî pêro pabesteyê yewbînan ê. Armanc oyo ke wa tecrîd bêro wedaritene û azadîya fîzîkîye ya Abdullah Ocalanî bêra caardene. Mesajê ma zelal o. Bêçarserîya meseleya kurdan hinî mîadê xo kerdo de. Rayîrê haştîye û çareserî Îmraliyî ra ravîyareno.''