Vervatoxa Meclîsê Cinîyan ê DBPyî Bêrîvane Bahçecî ard ziwan ke caardişê azadîya Ocalanî înan rê sebebê têkoşînî yo esas o. Bêrîvane bale ante hêrişanê îşxalî ser û vat: ''PDKyî herinda menfaetanê şarê kurdî de menfaetê xo weçînayî.
Vervatoxa Meclîsê Cinîyan ê DBPyî Bêrîvane Bahçecî kombîyayîşê çapemenîye de rojdem ercna.
Bêrîvane bale ante biranê îdamî yê Îranî ser û vat: ''Rejîmê Îranî bi îdaman cewab dano waştişanê cinîyan. Ma ney nimûneya Pexşane Ezîzî û Şerîfe Muhammed de vînenê. Tîya de welatê ma de zî 2024 de tewr tay 205 cinîyî ameyî qetilkerdene û 117 cinîyan zî bi hawayêkê şikdarî dinyaya xo bedilnaye. Na bîlanço bîlançoya şîdetê camêrdan a. Şîdetê camêrdan bi destê dewlete yeno normalîzekerdene.''
Bêrîvane vist vîrî ke îqtîdarê AKP-MHPyî vera Başûrî ancî dest pê hêrişanê îşxalî kerdo û vat: ''PDK nê ferasetê kolonyalîstî rê hemkarîye keno. Başûr de şar bi zorî dîyeno koçkerdene, baregehê PDKyî destê Tirkîya de yê. PDK xoserîya Başûrî visneno binê tehluke û AKP-MHP de hemkarîye keno. PDKyî herinda menfaetanê şarê kurdî de menfaetê xo weçînayî û serkêşê xayînîye. Ma venga PDKyî danê ke no îxanet do şima rê nêmano, îqtîdarê şima do kilmêr bibo.''
Bêrîvane ard ziwan ke kontrayê Hîzbullahî bi destê dewlete Amed de hêrişê waran û mekanan kenê. Bêrîvane vat: ''Sey polîtîkayanê şerê taybetî mîyanê ciwanan de tîryakî vila beno, tecrîdê vera Birêz Ocalanî beno giranêr, nuşteyê kurdkî rayîran ra esterîyenê, govende sey sebebê tepiştişî dîyena. AKP-MHP keno ke bi tecrîdî şerî pîlêr bikero.La komel ney qebul nêkeno. Caardişê azadîya Ocalanî ma rê sebebê têkoşînî yo esas o.''
