Derheqê 25. serrîya qedexeyê serê PKKyî de ewro konferansêko hîra peytextê Almanya Berlîn de yeno viraştene. Sernameyê konferansî „Qedexeyê PKKyî yo 25 serre - Zextê 25 serrî û demokrasîya ke xizmetê sîyasetê teberî yê Almanan de ya“ yo. 

Konferans hetê Komela Azadî, Komela Mîyan-neteweyîye Seva Heqanê Merdiman û Demokrasî (MAF-DAD), Komela Pawitoxan Seva Heqanê Merdiman (EJDM/ELDH) û Îdarekarîya Federale ya Roten Hilfe ra bi hawayêkê hemparî yeno organîzekerdene.   Parlamenteranê Partîya Çepî yê Alamaya ya pîya Hollanda û Belçîka ra zî  xeylî sîyasetmedar, huqûqkar  û pawitoxê heqê merdiman tewrê ci benê.

Îdarekaranê Komela Azadî ra Dr. Elmar Millich akerdişê Konferansî de qisey kerd. Millichî ard ziwan ke qedexeyê PKKyî serra 1993 de dest pêkerd û a roje ra heta ewro kurdî vera naye lingan ser o yî û dîqet ant hemkarîya Tirkîya û Almanya ser.

Bado zî Parlamenterê Partîya Çepî Thomas Flugerî qal girewt. Flugerî konferansî ra keyfweşîya xo arde ziwan û va:‘‘Polîsanê almanî waşt ke konferans meviraziyo û no zî nêzdîbîyayîşê almanya ê vera kurdan ramojneno.‘‘

Avûkatê kurdan ê Ewropa Edith Lunnebach zî ard ziwan ke qedexeyê vera kurdan bi îstîsnayî dest pêkerd û nê prosesî de no açarya qeydeyî. Lunnebachî mehkemaya Dusseldorfî vist vîrî û va ‘’ Salona mehkema sey qereqolê polîsan bî. Mehkemayan de vera kurdan huqûqo raşt ca nêanî.’’

Sîyasetmedaranê  kurdan ra Mehmet Demîrî zî xoverdayîşê şarê kurdî yê 40 serran ê Almanya vist vîrî û va:‘‘Bîlaheq Komelanê ma rê hêriş yeno kedene û aktîvîteyê ma yenê qedexekerdene.‘‘

Konferans de hema do pawitoxê ke tewrê muhakemekerdişanê dadgeha ke Belçîka de qerarê „PKK organîzasyonê terorî nêyo“ dabi ra Jan Fermon, pawitoxa dewaya seva ke Dîwanê Edaletî yê Ewropa de PKK lîsteya „Organîzasyonê terorîstî yê Yewîya Ewropa„ ra bêro vetene Tamara Buruma, Lukas Theune ke Almanya de pawitoxanê sîyasetkaranê kurdan ra yo, edîtoro verên ê WDRyî Jürgen Hoppe  û Parlamentera Eyaletê Hamburgî Cansu Ozdemire  qisey bikerî.