Hemsereka HDPyî ya Îzmîrî Berna Çelika ke ANFyî rê qisey kerd,  semedê tewrbîyayîşê mîtîngê ke do 12ê gulane de bêro kerdene veng da û vat:

“Ma pê coşê pîlî xebatanê xo yê weçînitişî rayra benê. Ma ge ge têhetameyîşê şarî kerdî.  Ma inkey keyeyan gêrenê. Pîya bi nînan ma bi rêxistinanê cinîyan yenê têhet. Reyna rêxistinê ma yê ciwanan xebatanê cîyayan kenê. weçînitişî semedê ma meseleya estbîyayîş û çînbîyayîşî ya. Ma warî de reaksîyonanê rindan genê. Hol aye ke ma pê Partîya Çep a Keske kewtî weçînitişî. Ma şarê xo bêalternatîf nêverda. Gerek ma Partîya Çep a Keske hêzdar bişawê meclîsî. No deynê milê ma pêrun o. Gerek ma 100 ra zafêr wekîlan vejê.”

Berna Çelîk vat: “Ma 12ê gulane de do Îzmîr de mîtîngê fînalî bikerê. Ma do saete 17.30 Meydanê Gundogduyî de bêrê têhet. Ma veng danê şarê xo, rêxistinanê cinîyan ke wa roje tewrê mîtîngê ma bibê û veng û rengê xo ramojnê.”