Hemsereka Konseya Rayberdişî ya KCKyî Besê Xozat Bernameyê Taybetî yê Medya Haber TVyî de rojdem ercna.

Qiseykerdişê Besê Xozat ra tayê noqtayê girîngî wina yê:

''Serrgêra ci de ez Komployê 9ê Teşrîna Verêne bi nefretî şermezar kena û xoverdayîşê Îmraliyî yê Rayber Apoyî selam kena. Komplo şexsê Rayber Apoyî de vera şarê kurdî ame kerdene. Nê komployî reyde Şerê Dinya yo 3. zî dîya destpêkerdene. 26 serran o serkêşîya partîya ma de şarê ma vera komployî xo ver dano û seba caardişê azadîya Rayber Apoyî têkoşîn keno. Rayber Apoyî zî zîndan de paradîgmaya xo ya Neteweya Demokratîke awan kerd û armancê komployî şiknayî. Rayber Apoyî bi nê hawayî xo resna şaranê dinya.

Nê komployî de PDK zî tede xeylêk hêzan cagirewt. Xora destpêkî ra nata PDKyî Kurdîstan de xeta îxanetî awan kerde. Hetê bînî ra wextê komployî de cara Rayber Apoyî adirbirnayîşêk îlan kerdbi. Rayber Apoyî seba çareserîya meseleya kurdan verê xo dabi Ewropa. La hêzanê serdestan seba ke çareserîye nêwaştêne vera Rayber Apoyî komplo kerd. Komployî bi hêrişanê îşxalî û qirkerdişî tim dewam kerd la vera nînan xoverdayîşî zî tim dewam kerd. Merkezê nê xoverdayîşî zî Îmrali yo. 

Hemleya 'Rayber Apoyî rê Azadîye, Meseleya Kurdan rê Çareserîye' serra xo ya yewine ha kena de. Hemle netîceyê xurtî vistî destî û fikrê Rayberîye vila kerdî. Ez pê bawer a ke hemle serra xo ya diyîne de zî bi serkewtişî dewam bikera. Çarçewa na hemle de 13ê teşrîna verêne de Amed de mîtîngêko pîl est o, ancî Koln û Îstanbul de mîtîngî est ê. Nê çalakîyî pêro manadar ê. Bingeyê Hemleya Azadîye de têkoşîno komelkî zî aver şi. Xora bê têkoşîn çîyêk nêbeno. Seke ma vat xeylêk dewlet, dezgeh û hêzan mîyanê komployî de cagirewt. Ganî vera nînan têkoşîno komelkî, sîyasî, dîplomatîk û komelkî bêro kerdene.

Bi taybetî Herêmanê Pawitişî yê Medya de her cayê Kurdîstanî de şero çetin dewam keno. Dewleta tirke armanc kena ke pêro Başûrî îşxal bikera û dima nê îşxalî vilayê parçeyanê Kurdîstanî yê bînan zî bikera. 4 serran ra nata dewleta tirke rixmê hende teknîk û hêrişan zî şer de ser nêkewte. Gerîlayî bi xoverdayîşê xo rûmetê pêro Kurdîstanî pawenê. Dewleta tirke bi hemkarîya PDKyî Başûr de cadana xo. PDK ser ra heta binî kewto mîyanê îxanetî. Dewleta Iraqî zî îşxalê dewleta tirke kena meşrû. Hinî yew îtîbarê nînan nêmendo.

Hîzbullah, Îran, Hamasî bi destê Îsraîlî derbê pîlî werdî; xora Tirkîya zî werdî. Îqtîdarê AKP-MHPyî mîyanê tengasîyêka pîle de yo. Erdogan vano 'Îsraîl do hêrişê Tirkîya bikero.' La çîyo winayên çin o. Tek tersê nînan kurd ê. Xora no şer do tesîrê Sûrîye û Iraqî zî bikero. Tirkîya do mîyanê nê şerî de bixeniqîya. Dişmenîya vera kurdan do biba peynîya Tirkîya. Ganî Tirkîya kurdan de pêbikera. 

Tirkîya tersena ke nê şerî ra kurdî do îstîfade bikerê. Bahçelîyî coka venga Iraq, Îran, Sûrîye ûsn. dano ke wa yewîya 'Kudusî' ronîya. Her kes zaneno ke Tirkîya Sûrîye vista nê halî. Tirkîya bi desan cergî ardî Tirkîya, vera rejîmê Sûrîye rêxistin kerdî. Nika zî ê kenê ke muxalefetê zereyî dîzayn bikerê. A roje Bahçelîyî destê îdareyê DEM Partî yê Meclîsî girewt, Serekê CHPyî de zî dîyalogî viraştî. Nê hê peyê karêkê neweyî de yê. Bahçelîyî babete ser o vato 'Ma zere de zî haştîye wazenê.' Eke ê haştîya zereyî wazenê wa Erdogan û Ozgur Ozelî zî bigêrê şorê Îmraliyî.

La derdê înan haştîye nîyo, derdê înan çareserîya meseleya kurdan zî nîyo. No derdê çareserîye teyna milê PKK û Rayber Apoyî de yê. Bahçelî xo peyê kayê neweyî de yo. Bahçelî keno ke mîyanê DEM Partî de û mîyanê muxalefetî de nîqaşan vejo û nînan parçe bikero. Ganî verê Bahçelîyî de bêro vatene ke 'eke şima haştîye wazenê, Îmrali ho uca de yo. Şêrê Rayber Apoyî de qisey bikerê.' Haştîye û normalîzebîyayîş Îmrali de yê. Ganî hêverî tecrîd bêro wedaritene. Wa şarê ma verê nê şerê taybetî de hayîdar bibo.

Başûr de weçînayîşî nêzdî benê. Şarê ma yê Başûrî hinî hemkaranê îşxalkeran zî welatperweran zî hol şinasneno. Wa şarê ma raya xo bido namzedanê welatperweran. Wa şarê ma xayînan û hemkaran sindoqan de bixeniqno.''