Hemsereka Konseya Rayberdişî ya KCKyî Besê Xozat Medya Haber TVyî de rojdem ercna.  Qiseykerdişê Besê Xozat ra tay noqtayê girîngî wina yê:

''Hemleya Azadîye ha serra xo kena temam. Tewr peyên Komîteya Wezîran a Konseya Ewropa cewab da mektuba 69 wayîranê Nobele. La pê ney nêqedîyeno. Ganî nê dezgehê ke awankaranê tecrîdê Îmralîyî ra yê, goreyê peymananê xo têbigêrê. Hemleya Azadîye resaya astêka bitesîre. Ganî heta ke netîce bêra girewtene hemle dewam bikera. Ganî şert û mercê tepişîyayîşê Rayber Apoyî bizanîyê. Ma bi taybetî roşnvîranê Tirkîya ra pawenê ke vera tecrîdî tewir bigêrê. Rayîrê haştîye azadîya Rayber Apoyî ra derbaz beno. 10ê teşrîna verêne de hemle kewena serra diyîne. Ganî merkezê têkoşînê seba azadîya Rayberîye bibo Vakurê Kurdîstanî. Ganî şarê ma hemle hîna global bikero û qetî ser bivisno.

Peymana Iraq, Tirkîya û PDKyî ra dima hêrişê vera sivîlan zêdîyayî. Nê rojanê peyênan de xeylêk merdimê sivîlî şehîd bîyî. Xora Behdînan de dewî yenê xalîkerdene, merdimî dîyenê koçkerdene. Xeylêk cergê DAÎŞî Behdînan de ameyî cakerdene. 2014 de dewleta tirke PDK û DAÎŞ de peymanêke viraşte. Goreyê ney Mûsil û Şingal do teslîmê DAÎŞî biameyêne kerdene, Kerkûk do PDK de bimendêne û dewleta tirke do şirîka petrolê Kerkûkî bibîyêne. Xora na peymane nimite bîye. Dima DAÎŞ bin kewt la na îtîfaqê Tirkîya-DAÎŞ-PDKyî nêxeripîya. Nika Huda Par û Hîzbulkontra zî tewrê nê îtîfaqî bîyî. Nê mutefîqî ewro pîya Behdînan de, Herêmanê Pawitişî yê Medya de têgêrenê.

PDK nika keno ke Iraqî zî tewrê nê îtîfaqî bikero. PDK destpêkî ra nata mîyanê nê şerê qirkerdişî de yo û vera PKKyî şer keno. PDK seba ke PKK bêro dekerdene lîsteya terorî zaf xebitîya. Hetê bînî ra îşxalê Efrîn, Serêkanîyê û Girê Sipî zî eserê PDKyî yo. PDKyî seba binkewtişê Şorişê Rojawanî zaf xîret kerd.

PDK îstîxbarat dano dewleta tirke, dima nê şehadetî qewimîyenê. Parastin welatperweranê kurdan dano kiştene. Her ca de vera ajanan ganî ma bi xurtî têbigêrê. Bi taybetî roşnvîrê kurdan vera îtîfaqê dewleta tirke-PDK-DAÎŞ-Hîzbulkontrayan bi tûjî nêrazîbîyayîşê xo bimojnê. Meverdê ke na şebekeya ajan-xayîne erdê Kurdîstanî de bimana.

Xora Hîzbulkontra baskêka JÎTEMî bîya. Serranê 90an de Hîzbulkontrayî sere de malayî xeylêk welatperwerî bi hawayêkê barbarî qetil kerdî. Ewro ancî nê kontrayî vera têgêrayîşê azadîye visîyayî dewre û hê Meclîs de yê. Yew eleqeyê nînan bi Îslamîyet û Kurdayetîye zî çin o. Wa şarê ma vera Hîzbulkontrayan hişyar bibo. 

AKP keno ke bi rayîrê dînî û Hîzbulkontrayan kurdan bigêro binê kontrolî. AKPyî bi polîtîkayanê xo Tirkîya arde verê rijîyayîşî. Îtîfaqê AKP-MHP-Hîzbulkontra-Ergenekonî xora rijîyayo.

Meseleya Tirkîya ya bingeyîne meseleya kurdan a . La CHP seba çareserîya na mesele gamêke zî nêerzena. CHP caardişê edaletî ra behs keno la verê tecrîdê Îmraliyî de fekê xo anêkeno. Şer est o. Meseleya Tirkîya ya esase şer o. 

Erdogan û Sisi ancî benê nêzdî. Erdogan şerê vera têgêrayîşê azadîye de bin kewt. Nika zî keno ke Esad de pêvînayîş bikero. Erdogan wazeno Esad de vera kurdan îtîfaq bikero. Tirkîya polîtîkayêka gemarine ana ca. Tirkîya wazena endama BRICSî biba ke tede Rûsya serdest a. Tirkîya nê têkilîyanê pêroyînan seba qetilkerdişê kurdan kena û şuxilnena.''